Այս պահին ՀՔԾ-ում Երեւանի փոխոստիկանապետ Վալերի Օսիպյանի եւ նրա եղբորորդու մասնակցությամբ դանակահարության գործով վկա Սամվել Հովհաննիսյանի առերես հարցաքննությունն է տեղի ունենում: Արդեն մոտ մեկ ժամ է՝ այն սկսվել է:
Առավոտյան էլ Վալերի Օսիպյանը առերեսվել է Սամվել Հովհաննիսյանի մոր՝ Սուսաննա Հովհաննիսյանի հետ:
Տիկին Հովհաննիսյանը Aravot.am-ին պատմեց, որ վեց ժամ տեւած առերեսման ընթացքում պարոն Օսիպյանը դանակահարությանը չառնչվող հարցեր է բարձրացրել, մասնավորապես տիկին Հովհաննիսյանից հարցրել է՝ ձեր ամուսինը փող կորցրե՞լ է, դուք տոկոսով փող տալի՞ս եք. «Դա բացարձակապես կապ չունի դանակահարության հետ, դանակահարվածի մայրն էլ է ասում, որ ձեր եղբորորդին է կատարել: Հիմա՝ ինչով ես կաշառել տուժածի մորը, ինձ չի հետաքրքրում»:
Տիկին Հովհաննիսյանը նաեւ պատմեց, որ առերեսման ժամանակ էլ է պատմել, որ Վալերի Օսիպյանի եղբորորդին՝ Սեդրակը Նուբարաշենում վերջին երեք տարում մի քանի հանցագործություն է արել. «Դանակահարությունը Սեդրակի կատարած առաջին հանցագործությունը չէ: Առաջին անգամ նա կտրել էր զոհված ազատամարտիկի ականջը, գնացին, խնդրեցին, որ չբողոքի, գործը ծածկեցին: Մյուս դեպքն էլ մեր ներքեւի սեփական տներից Մարինեի տղա՝ Հովիկի դանակահարությունն էր, ոտքից էր խփել»:
Կարդացեք նաև
Առերեսման ժամանակ փոխոստիկանապետն էլ սպառնացել է, որ այնպես կանի, տիկին Սուսաննայի վրա քրեական գործ կհարուցեն, քանի որ իր մայրը վատացել է, երբ Սեդրակի մասնակցությամբ դանակահարության օրը, իրենք գնացել են իրենց տուն:
Արփինե ՍԻՄՈՆՅԱՆ
Լուսանկարը՝ https://galatv.am/-ի
