Հուլիսի 28-ին Տավուշի մարզի Հաղթանակ գյուղում հուղարկավորվել են 19-ամյա Խաչատուր Բադասյանին, ով զոհվել էր Լեռնային Ղարաբաղում ադրբեջանական դիվերսիայի հետեւանքով: Նա ընտանիքի միակ տղան էր:
Խաչատուրը հետմահու արժանացել է Լեռնային Ղարաբաղի հանրապետության «Արիության համար» մեդալի: Հաղթանակի գյուղապետ Վահրամ Շարոյանից տեղեկացանք, որ Լեռնային Ղարաբաղի պաշտպանության բանակը հոգացել է Խաչատուրի դիակի տեղափոխությունը, նրա հոգեհացի ծախսը, նաեւ որոշակի գումար է նվիրաբերել նրա ընտանիքին:
Հաղթանակի 250 ընտանիքները, ավանդույթի համաձայն, գումար են հանգանակել համագյուղացի վշտատեր ընտանիքի համար: Բացի այդ, գյուղի շուրջ 50 երիտասարդներ` գյուղապետի գլխավորությամբ, փող են հանգանակել Բադասյանների ընտանիքին աջակցելու համար: Վահրամ Շարոյանն ասաց, որ Խաչատուրի հուղարկավորությունը կատարվել է նրա հորեղբոր տնից , ապա սգավորները գնացել են այն տուն, ուր ժամանակավորապես ապրում են Բադասյանները:
Զոհվելուց քիչ առաջ սոցիալապես անապահով, տնազուրկ ընտանիքը կարողացել է տուն գնել, որի մասին հայրը՝ Լեւոն Բադասյանը հեռախոսով տեղեկացրել է որդուն: Խաչատուրը կարծես թե վատ բան կանխազգալով՝ հորն ասել է, որ ինքն այնտեղ չի ապրելու:
Կարդացեք նաև
Լուսանկարում՝ զոհված ազատամարտիկների հուշարձան-խաչքարը Հաղթանակում
Ոսկան ՍԱՐԳՍՅԱՆ
