Շանթ Հարությունյանի եւ ընկերների գործով դատական նիստին այս պահին հարցաքննվում են գործով տուժող ներգրավված ոստիկաններ:
Տուժող ոստիկան Ազիզ Միրզոյանը պատմեց, որ ամբաստանյալներին նախապես չի ճանաչել, նրանց օպերայի հարթակի վրա է տեսել: Ծառայության ընթացքում տարածքում շրջագայելիս լսել է ոստիկանների կոչերը՝ փողոց դուրս չգալու մասին, ապա տեսել է պայթյուններ ու վազելով գնացել է Մաշտոցի պողոտա, որտեղ տեղի էին ունենում այդ գործողությունները:
«Պայթյունից մուխ է եղել, ծուխ է լցվել աչքերս, մի պահ, արցունք է լցվել, արցունքները մաքրել եմ, տեսել քաշքշոց»,- պատմեց տուժող ոստիկանը:
Պաշտպանական կողմը նրան հարցեր չտվեց:
Կարդացեք նաև
Հաջորդ տուժող Ռազմիկ Խառատյանն էլ պատմեց, որ Ազատության հրապարակի հարակից տարածքում ծառայություն իրականացնելիս նկատել է Շանթ Հարությունյանին ու ընկերներին, բայց ոչ մի ագրեսիվ պահվածք չի տեսել: Ծառայության ընթացքում տարածքում շրջագայելիս լսել է, որ երթ են նախատեսում: Ավելի ուշ նկատել է խառնաշփոթ, լսել է ոստիկանների կոչերը դուրս գալ մայթ, ապա պայթյուններ: Նրա պատմելով, ակտիվիստները չէին կատարում ոստիկանների օրինական պահանջը, հայհոյում էին: Բայց հայհոյողին չի տեսել:
Ոստիկանների կողմից նախազգուշացում չի լսել: Պատմեց, որ պայթյունների ժամանակ ծխից աչքերը մրմռացել են, արցունքակալել են, բայց հրաժարվել է բժշկի դիմել:
Ըստ նրա, ակտիվիստները փայտե ձողեր ունեին՝ բահի կոթ հիշեցնող: Հետո էլ ասաց, որ փողոցում նկատել է, թե ինչպես էին հարվածում ոստիկաններին, դիմադրություն ցույց տալիս:
Հարցին՝ ոստիկանները բարձրախոսով դիմո՞ւմ էին ակտիվիստներին, ասաց՝ չի հիշում, հետո էլ ասաց՝ ցուցմունքիս մեջ կա, նայեք:
Ամբաստանյալներից մեկի հարցին, թե ովքեր են հայհոյել, ոստիկանն ասաց, որ իր նախաքննական ցուցմունքում գրել է, բայց հայհոյողները ամբաստանյալների մեջ չկան:
Հետո պատմեց, որ քաղաքացիական համազգեստով անձին, որը ոստիկան էր, երկու քաղաքացի հարվածում էին: Հարցին՝ ինչ գիտես, որ նա ոստիկան էր, ասաց՝ այդպես էր ներկայանում:
«Իսկ քաղաքացիներն ասում էին միլիցա է, խփեք»,- ասաց ոստիկանը:
Նաեւ պատմեց, որ ինքը ցուցարարներին փորձել է հետ մղել, այդ ընթացքում քաղաքացիական համազգեստով ոստիկանը կարողացավ հեռանալ:
Հարցին՝ քաղաքացիական համազգեստով ոստիկանը որեւէ փաստաթուղթ ցույց տվե՞ց, ոստիկանն ասաց՝ խառնաշփոթ էր, լավ չի հիշում, բայց փաստաթուղթ ցույց չի տվել, միայն ասել է, որ ոստիկան է:
Ամբաստանյալ Վարդան Վարդանյանն էլ հարցրեց, 25 մետրից ինչպե՞ս ես լսել ինչ են հորդորել ոստիկանները (ոստիկանը մինչ այդ ասում էր, որ 25 մետրից է լսել ոստիկանների հորդորները), ասաց՝ ընդհանուր հորդորներ է լսել:
Վարդան Վարդանյանի դիտարկմանը, թե նույնիսկ տեսախցիկը հինգ մետրից չի արձանագրել հորդորները, ինչպե՞ս ես դու լսել 25 մետրից, ասաց դա տեսախցիկի խնդիրն է ու շրջվելով դատախազի ուղղությամբ հարցրեց՝ հը՞, լա՞վ էր:
Հարցին՝ ինչի՞ց ես հավատացել, որ քաղաքացիական համազգեստով անձը ոստիկան է, կարող է ասում էր Հռոմի պապն եմ, խաչակնքվելո՞ւ էիր, նա չպատասխանեց:
Հետո էլ Շանթ Հարությունյանն ասաց՝ երեխուն մի նեղեք, հարցեր մի տվեք, թողեք թող գնա: Գնա ֆռֆռա, պոնչո:
Արփինե ՍԻՄՈՆՅԱՆ
ՇԱՆԹ ՀԱԼԱԼ Է ՔԵԶ,,,,,,,,,,,,