«Արեւի ուղիղ ճառագայթների տակ մի գտնվեք, հագեք բաց գույնի բամբակյա հագուստներ, օգտագործեք շատ քանակությամբ հեղուկներ»,- ամռան այս տապը հաղթահարելու եւ առողջությունը չվտանգելու համար այսօր «Ֆորում» ակումբում քաղաքացիներին այսպիսի խորհուրդներ տվեցին սրտաբան Վահե Սարգսյանը եւ արտակարգ իրավիճակների նախարարության «Հիդրոմետ» ծառայության օդերեւութաբանության կենտրոնի պետ Զարուհի Պետրոսյանը: Տիկին Պետրոսյանի հավաստմամբ՝ այս ամռանը ջերմաստիճանը 40-ի շեմը չի անցել եւ ամենաբարձր ջերմաստիճանը դիտվել է հուլիսի 17-ին՝ 38-39 աստիճան:
ԱԻՆ փրկարար ծառայության օպերատիվ կառավարման վարչության արտակարգ իրավիճակների արձագանքման բաժնի պետ Արթուր Ոսկանյանի խոսքերով՝ այս տարի մեծածավալ անտառային հրդեհներ չեն գրանցվել, այրվել է ընդամենը մի քանի հեկտար խոտածածկ տարածք: Մասնագետը վստահեցրեց, որ ամեն տարի հրկիզված տարածքները մշակվում եւ խնամվում են:
Այն հարցին, թե արդյոք բարձր ջերմաստիճանի դեպքում վտանգավո՞ր չէ արեւի տակ աշխատելը կամ աշխատանքի գնալը, տիկին Պետրոսյանն ասաց, որ մեր երկրում մարդիկ աշխատանքի են գնում առավոտյան եւ վերադառնում երեկոյան, ուստի նրանք արեւի ուղիղ ճառագայթների տակ չեն գտնվում, իսկ աշխատավայրում պետք է այնպիսի պայմաններ լինեն, որ մարդիկ չվտանգեն իրենց առողջությունը: Ինչ վերաբերում է այն մարդկանց, որոնք աշխատում են դրսում՝ արեւի ուղիղ ճառագայթների տակ, ապա տիկին Պետրոսյանի կարծիքով, գործատուն պետք է այդ ժամերին մարդկանց չաշխատեցնի:
Բժիշկ սրտաբանի խոսքերով էլ՝ ցերեկային ժամերին մեծահասակները, հատկապես սրտանոթային խնդիրներ ունեցողները, պետք է խուսափեն դրսում լինելուց եւ ավելի շատ ժամանակը անցկացնեն հով տեղում, պառկած: Ըստ նրա՝ այս սեզոնին սրտանոթային խնդիրներով դեպքեր այնքան հաճախ չեն գրանցվում, ինչպես գարնանը, քանի որ այդ հիվանդությունները ակտիվանում են գարնանը:
Վահե Սարգսյանի խոսքերով՝ ամռանը մարդիկ հաճախ են դուրս գալիս քաղաքից, գնում հանգստանալու եւ դրանով է պայմանավորված սրտանոթային խնդիրների դեպքերի նվազումը:
Կարդացեք նաև
Լուսինե ԲՈՒԴԱՂՅԱՆ
