Ըստ Ռուբեն Պողոսյանի՝ նեւրոզը կապված է նաեւ սեռականության եւ հոգեսեռական զարգացման ուղղու հետ
«Երբ որ փոքրերն ունենում են տարբեր նյարդային շարժումներ, եղունգների կրծոտում, քթի մեջ փորփրում, դրանք բոլորը նեւրոզի ախտանիշներ են»,- այսօր՝ հուլիսի 26-ին, «Պոստ սկրիպտում» մամլո ակումբում լրագրողների հետ հանդիպման ընթացքում հայտարարեց «Այգ» հոգեբանական կենտրոնի գլխավոր մասնագետ, Խ. Աբովյանի անվան մանկավարժական համալսարանի տարիքային եւ մանկական ամբիոնի դոցենտ, հոգեբանական գիտությունների թեկնածու Ռուբեն Պողոսյանը:
Նա համարում է, որ հիվանդության մասին կարեւոր տեղեկություններ է տալիս մարդու ծննդյան մասին ճշմարտությունը, եւ անգամ հղիության ընթացքում տեղի ունեցածը կարող է նման խնդրի պատճառ դառնալ:
Պարոն Պողոսյանի պնդմամբ՝ նեւրոզով հիվանդ մարդը տարբերում է իրականությունը, նրանք միշտ իրենց համար ստեղծում են անորոշություններ.
Կարդացեք նաև
«Բոլոր նեւրոտիկները ժամանակ չեն ուզում ճանաչել, որովհետեւ ժամանակը սոցիալականություն եւ որոշակիություն է ցույց տալիս: Իրենք ուզում են կորցնել այդ որոշակիությունը եւ սոցիալականությունը»:
Ռուբեն Պողոսյանը համարում է, որ նեւրոզը կապված է նաեւ սեռականության եւ հոգեսեռական զարգացման ուղղու հետ: Ըստ նրա՝ հիվանդության համար ամենախոցելի շերտերն են համարվում՝ կանայք, երեխաները եւ ծերերը, բայց միշտ չէ, որ նեւրոզը վատ է մարդու համար.
«Մարդ, որ կարողանում է իր զարգացման փուլերում դժվարություններն հաղթահարել, անշուշտ նա կարողանում է հաղթահարել նեւրոզը: Նեւրոզը նաեւ ակտիվության փուլ է, եւ երբեմն այդքան վատ բան չէ»:
Ամի ՉԻՉԱԿՅԱՆ
