Ծագումով թուրք գերմանացի ռեժիսոր Ֆատիհ Ակինի «Կտրվածք» (The Cut) ֆիլմը, որը պատմում է Հայոց ցեղասպանության մասին, առաջին անգամ կցուցադրվի Վենետիկի 71-րդ փառատոնի ժամանակ, որը տեղի է ունենալու օգոստոսի 27-ից սեպտեմբերի 6-ը, հայտնում է «Արմենիան Ուիքլի»-ն:
Ֆիլմը պատմում է Նազարեթ Մանուկյան անունով մի տղամարդու մասին, որը, փրկվելով ցեղասպանությունից, իմանում է, որ իր զույգ դստրերը հավանաբար ողջ են, գնում է նրանց փնտրելու: Նազարեթը սկսում է ճանապարհորդել իր գյուղից՝ Մարդինից դեպի անապատ, այնուհետև՝ Կուբա և ի վերջո հասնում է ԱՄՆ-ի Հյուսիսային Դակոտա նահանգ:
Նազարեթի կերպարը համր է, նրա դերը խաղում է ֆրանսիացի դերասան Թահար Ռահիմը, որը հայտնի է «Մարգարե» (Prophet) ֆիլմից:
Ֆիլմում նաև նկարահանվել են Արսինե Խանջյանը, Սիմոն Աբգարյանը, Ակին Գազին և Ջորջ Ջորջոն:
Կարդացեք նաև
Ակինն այս ֆիլմը ներկայացրել էր Կանի փառատոնին, սակայն «անձնական պատճառներով» վերջին րոպեներին հետ էր վերցրել:
Համբուրգում ծնված Ֆատիհ Ակինը թուրք ամենահայտնի ռեժիսորներից է: 2004թ. Բեռլինի փառատոնում նա գլխավոր մրցանակն է ստացել, իսկ 2007թ. Կաննում հաղթել է լավագույն սցենար անվանակարգում:
Պատրաստեց Հովհաննես ԻՇԽԱՆՅԱՆԸ
