Այսօր Երևանի ավագանու «Բարև Երևան» խմբակցության անդամ Անահիտ Բախշյանը հարցում է ուղարկել քաղաքապետ Տարոն Մարգարյանին, որը ներկայացվում է ստորև:
Հարգելի պարոն Մարգարյան,
Խնդրում եմ սպառիչ պատասխան տալ երևանցիներին անչափ հուզող հետևյալ հարցերին.
• Հյուսիսային պողոտայի սալիկապատման աշխատանքների վերաբերյալ հայտարարված մրցույթում ո՞ր կազմակերպությունն է հաղթել,
• Ո՞ւմ կողմից է ֆինանսավորվում պողոտայի վերանորոգման աշխատանքը,
• Ե՞րբ են ավարտվելու այդ աշխատանքները,
• Երևանի փողոցներում դրված թանկարժեք նստարանների լաքը, ըստ պատկան պաշտոնյաների հայտարարությունների, չպետք է թափվեր, որովհետև դրանց փայտը հատուկ տեխնոլոգիայով եփված լինելով, անձրևներից պետք է պաշտպանված լիներ: Այնինչ շատ տեղերում, մասնավորապես Մալաթիայի Անդրանիկ արձանի տարածքի, Կոմիտաս պողոտայի վրայի և շատ այլ վայրերում դրված նստարանները խունացել են ու լաքը թափվել է: Փաստորեն այդ նստարանները շատ թանկ են նստում Երևանի բյուջեի վրա: Հետևո՞ւմ է արդյոք քաղաքապետարանի համապատասխան կառույցը թանկարժեք նստարանների որակին: Մի՞թե այլընտրանք չկա, կարծում եմ կարելի է գտնել: Այս և նման շատ դեպքերում, (օրինակ դրոշները փոխելու վրա ծախսած գումարները) կարծում եմ Երևանի բյուջեն շատ ավելի արդյունավետ կարելի է ծախսել՝ առաջնորդվելով ժողովրդական իմաստուն ասացվածքով՝ « ոտքդ մեկնիր քո վերմակի չափով »:
Շնորհակալություն համագործակցության համար:
Կարդացեք նաև
Անահիտ Բախշյան
Երևանի ավագանու «Բարև Երևան» խմբակցության անդամ
