Առցանց «Առավոտի» եթերում թեման քննարկում են տնտեսական մեկնաբան Արա Գալոյանը եւ «168 ժամ» թերթի լրագրող Բաբկեն Թունյանը
Արամ Աբրահամյան.– «Առավոտի» օգտատերերից մեկը հարցնում է` այս 100 օրում քանի՞ գործարար է դուրս եկել ստվերից:
Արա Գալոյան.– Հարց տվողը երեւի բավական ուշադիր մարդ է, որովհետեւ նոր կառավարությունը բացի ստվերի դեմ պայքարի մասին զրույցից, համարյա ոչինչ չի ձեռնարկել անցած 100 օրում: Ստվերի դեմ պայքար արտահայտությունը ինքնին ենթադրում է, որ պետք է լինի հակառակ՝ լուսավոր կողմը, որին ստվերը դիմադրում է: Ոչ ոք չի դիմադրում, հետեւաբար ոչ ոք չի պատրաստվում ստվերից դուրս գալ:
Ա. Ա.– Գործարարներից մեկը այն՝ կառավարության հայտնի «հակաստվերային» ժողովից հետո հարցրեց՝ լո՞ւրջ եք ասում, որ պետք է ստվերից դուրս գանք:
Կարդացեք նաև
Բաբկեն Թունյան.- Հենց այդ հարցը իր մեջ պատասխան է պարունակում, այսինքն՝ ստվերից դուրս գալու պահանջը այդ կազմով, այդ գործարարների հետ ու այս իշխանական դեմքերով այնքան անհեթեթ է թվում, որ ոչ ոք չի հավատում, որովհետեւ այդ կազմը ստվերից դուրս բերելով` նշանակում է իշխանությունը ինքն իրեն է վնաս տալիս:
Ա. Ա.– Մենք կարո՞ղ ենք գնահատական տալ տնտեսական բլոկի նախարարների փոփոխությանը` Դավիթ Սարգսյանի փոխարեն Գագիկ Խաչատրյանը եւ Վահրամ Ավանեսյանի փոխարեն Կարեն Ճշմարիտյանը: Նրանք ի՞նչ տեսլական ներկայացնող նախարարներ են:
Ա. Գ.– Տեսլականը չեմ տեսնում, նոր կառավարությունը, ի տարբերություն թեկուզ նախորդի, որեւէ տեսլական առաջ չի քաշել, եւ տնտեսական բլոկի, եւ վարչապետի անձի ընտրությունը այս կառավարության ձեւավորումից այն տպավորությունն է ստեղծում, որ իշխանությունները պատրաստվում են ինչ-որ բանի` լուրջ միջոցառման, ակցիայի: Ինչ նպատակով, ինչ է կատարվելու՝ պարզ չէ: Իրականում նոր մարդ չկա՝ հին, վաղուց արդեն հայտնի դեմքեր են՝ եւ ֆինանսական սկանդալներով հայտնի, եւ քաղաքական, եւ հասարակական ինչ-որ աղմկոտ պատմությունների մեջ ընկած: Հիմա հավաքված են պրակտիկ մարդիկ, բայց ինչ նպատակ ունեն, ինչու են կենտրոնացրել այդքան հայտնի ֆիգուրներ՝ պարզ չէ:
Ա. Ա.– Կարո՞ղ եք գուշակել` ինչի են պատրաստվում, գուցե ընտրություններին, սովորաբար քաղաքական գործիչները պատրաստվում են ընտրությունների՝ կա այդպիսի դասական պատկերացումներում:
Բ. Թ.- Ինձ մոտ հակառակ տպավորությունն է՝ ոչ թե պատրաստվում են, այլ ոնց որ ետ գնացած լինենք նախորդ ժամանակաշրջան: Նախարարները կրկին պաշտոններ զբաղեցրել են, ու որ ասենք՝ ինչ-որ երեւելի արդյունքներով էին աչքի ընկել, այդպես չէ:
Ա. Գ.– Երբ որ ես ասում եմ` պատրաստվում են ինչ-որ լուրջ բան անել, ես բոլորովին նկատի չունեմ, որ դա արվելու է վասն պետության կամ վասն ժողովրդի: Նրանք, խոշոր սեփականատեր լինելով, հետապնդում են իրենց շահերը:
Քննարկումն ամբողջությամբ
Պատրաստեց
ԱՐԱՄ ԱԲՐԱՀԱՄՅԱՆԸ
«Դեմ առ դեմ» հաղորդաշարը իրականացվում է Բաց հասարակության հիմնադրամներ-Հայաստանի կողմից: Սույն հաղորդման մեջ տեղ գտած տեսակետները եւ վերլուծությունները արտահայտում են մասնակիցների կարծիքը եւ հաստատված չեն Բաց հասարակության հիմնադրամներ-Հայաստանի կամ նրա խորհրդի կողմից։ Սույն հաղորդման պատրաստումը հնարավոր է դարձել Բաց հասարակության հիմնադրամներ-Հայաստանի ամբողջական ֆինանսական օժանդակության շնորհիվ՝ ԶԼՄ-ների աջակցման ծրագրի շրջանակներում, դրամաշնորհ N18624։
