«Այս դեպքում, այո արդարությունը հաղթեց: Բայց դատական համակարգի նկատմամբ վստահություն առաջացավ, թե`ոչ, մի գործով դժվար է ասել: Այս դեպքում արդարադատություն իրականացվեց: Մյուս դեպքերում արդարություն կլինի, թե`ոչ…մենք գիտենք Հայաստանում արդարադատությունը կամ դատական համակարգն ինչ վիճակում են գտնվում: Խիստ կասկածում եմ, որ վստահությունը միանգամից կվերականգնվի»,- Aravot.am-ի հետ զրույցում ասաց քաղաքացիական ակտիվիստ Մհեր Արշակյանը:
ՀՀ Վարչական դատարանն այսօր հօգուտ չորս քաղաքացիական ակտիվիստի վճիռներ կայացրեց`ոչ իրավաչափ ճանաչելով Ոստիկանության Երեւան քաղաքի կենտրոնական վարչության ոստիկանների գործողությունները եւ հօգուտ ակտիվիստների ոստիկանությունից 150 հազարական դրամ գանձելու որոշումներ կայացրեց: Հիշեցնենք, գործերը վերաբերվում են անցյալ տարի, օգոստոսի 24-ին, ընդդեմ տրանսպորտի թանկացման ակցիաների ժամանակ քաղաքացիական ակտիվիստների եւ ոստիկանների միջեւ տեղի ունեցած միջադեպերին: Վարչական դատարանի այսօր կայացրած որոշումը քաղաքացիական ակտիվիստ Մհեր Արշակյանի համար անսպասելի չէր: «Բայց, հակառակ դեպքում, իրենք շատ լավ հասկանում էին, որ Եվրոպական դատարանում հաղթելու ենք, ակնհայտ էին ոստիկանության ապօրինի գործողությունները»,- ասաց Մհեր Արշակյանը`հավելելով, որ մշտապես պայքարելու է իր սահմանադրական իրավունքների պաշտպանության համար:
Նելլի ԳՐԻԳՈՐՅԱՆ
