Արաբկիրի սոցիալական ծառայության պետ Հովհաննես Հովհաննիսյանը հրաժարվեց դատարանում ցուցմունք տալ եւ պատասխանել հարցերին: Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Արշակ Վարդանյանը հրապարակեց նախաքննության ժամանակ Հ. Հովհաննիսյանի տված բոլոր ցուցմունքները: Դրանք 6-ն էին, որից 4-ը՝ կասկածյալի կարգավիճակում, իսկ 2-ը նա տվել էր որպես մեղադրյալ: Ի դեպ, Հովհաննիսյանի նկատմամբ խափանման միջոց էր ընտրվել ստորագրություն քաղաքից չբացակայելու մասին: Հովհաննիսյանը իր ցուցմունքներում պնդել էր, թե տեղյակ չի եղել կենսաթոշակների դեպոնենտային գումարներից, քանի որ ըստ կարգի՝ կենսաթոշակառուները ստորաբաժանում էին ներկայացնում դիմումներ, իսկ այդ դիմումները իրենք ուղարկում էին վճարային ծառայություն:
Թե ով էր ստորագրել՝ ինքը տեղյակ չի եղել, իսկ այն հարցին էլ, թե իրեն երբեւէ մասնաբաժին տրվե՞լ էր, պատասխանել էր, որ ոչ Վազգեն Խաչիկյանը եւ ոչ էլ որեւէ մեկը իրեն գումար չի տվել: Արաբկիրի տարածքային բաժնում Վերահսկիչ պալատը եւ ֆինանսների նախարարությունը ստուգումների արդյունքում հայտնաբերել էին խախտումներ եւ քանի որ ինքը եղել է տարածքայինի պատասխանատուն, ուստի 2 մլն դրամից ավելի գումար է վերականգնել: Նախաքննության փուլում գործի նյութերում դրվել էր 90 մլն դրամի պարտավորագիր, որը տրվել էր Վազգեն Խաչիկյանի կողմից Հովհաննես Հովհաննիսյանին: Վերջինն ասել էր, որ իր անձնական գումարներից պարտք է տվել Խաչիկյանին, որը մինչ օրս չի վերադարձրել, իսկ թե ինչ նպատակով էր պարտքը վերցրել՝ ինքը տեղեկություններ չի ունեցել: Քննիչի այն հարցին, որ այդ գումարը Խաչիկյանը վերցրել է այն ժամանակ, երբ ստուգումնե՞ր էին անցկացվում Արաբկիրի բաժնում, Հովհաննիսյանն ասել էր, որ իրեն ընդամենը խնդրել է Խաչիկյանը եւ ինքը իր գործընկերներից մեկի «Մերսեդես» ավտոմեքենայում տվել է գումարը եւ ստացել պարտավորագիրը՝ գումարը վերադարձնելու մասին:
Մանրամասները՝ քիչ ուշ:
Կարդացեք նաև
Ռուզան ՄԻՆԱՍՅԱՆ
