ՀՀ ոստիկանության քննչական գլխավոր վարչության Երեւան քաղաքի Կենտրոնականի քննչական բաժնի քննիչ Աշոտ Մկրտչյանի վարույթում է գտնվում «Էյ Ջեյ Էյ Հոլդինգ» ՓԲ ընկերության տարածքում տեղի ունեցած դեպքի առթիվ հարուցված քրեական գործի վարույթը:
Քննիչը որոշում է կայացրել քրեական գործ հարուցել չափագրումներ իրականացնող «Զեւս ստուդիա» ՍՊ ընկերության աշխատակից Լեւոն Դավիթի Հունանյանի մահվան կապակցությամբ:
Ըստ նախնական տեղեկատվության, Լեւոն Հունանյանը «Էյ Ջեյ Էյ Հոլդինգ» ՓԲ ընկերության երրորդ մասնաշենքի տանիքի վրա արեւային լուսավորությունն ապահովող օրգանական ապակուց թմբաձեւ երդիկի կոտրվելու պատճառով ընկել է հատակին, կորցրել գիտակցությունը, ապա անգիտակից նրան տեղափոխել են առաջին համալսարանական հիվանդանոց:
Երիտասարդը գիտակցության չգալով մահացել է:
Կարդացեք նաև
Դեպքը տեղի էր ունեցել այս տարվա ապրիլի 13-ին:
Քննիչը որոշում էր կայացրել նաեւ տուժողի իրավահաջորդ ճանաչելու մասին:Տուժողի հորը` Դավիթ Հունանյանին մայիսի 24-ին ճանաչել էր տուժողի իրավահաջորդ:
Իրավահաջորդի ներկայացուցիչն է փաստաբան Լիպարիտ Սիմոնյանը, որն էլ «Առավոտին» ասաց, որ փորձաքննությունների փուլում է գործը գտնվում:
Ռ.Մ.
«Առավոտ» օրաթերթ
23.07.2014
