«Ոսկե ծիրան» երեւանյան միջազգային կինոփառատոնը, ի թիվս այլ անվանի ռեժիսորների, այս տարի Հայաստան էր հրավիրել նաեւ հարավկորեացի աշխարհահռչակ կինոռեժիսոր Կիմ Կի Դուկին:
Aravot.am-ի հետ զրույցում «Ոսկե ծիրան» կինոփառատոնի ծրագրերի համակարգող, կինոքննադատ Րաֆֆի Մովսիսյանը հայտնեց, որ ռեժիսորի հետ բանակցել են երեք տարի. «Ամեն տարի Կիմ Կի Դուկը խոստանում էր գալ Հայաստան, եւ դա վերջապես իրականություն դարձավ այս տարի՝ 11-րդ «Ոսկե ծիրանին»:
Րաֆֆի Մովսիսյանը հայտնեց, որ սկզբում մտավախություն ունեին, թե նման համբավի ու տաղանդի տեր ռեժիսորի ընդունելության հետ կապված ինչ-ինչ բարդություններ կծագեն, քանի որ հաճախ աշխարհահռչակները քմահաճ են լինում, սակայն Կիմ Կի Դուկն իր պահվածքով ապացուցել է, որ պարզ ու անկեղծ մարդ է, պատրաստ՝ բոլորի հետ շփումների:
Ըստ «Ոսկե ծիրանի» ծրագրերի համակարգողի, հարավկորեացի ռեժիսորը սիրով զրուցել ու լուսանկարվել է իր արվեստի բոլոր երկրպագուների, լրագրողների հետ: Ավելին, իրենք հաշվել են, որ Երեւանում Կիմ Կի Դուկի հետ գրանցվել է ավելի քանի 300 սելֆի՝ տեղադրված ֆեյսբուքում եւ այլ հարթակներում:
Կարդացեք նաև
Րաֆֆի Մովսիսյանը հավելեց, որ պատահական չէր Հայաստանով հիացած Կիմ Կի Դուկի՝ Հայաստանում երգելը: Հարավկորեական «Արիրան» ազգային երգը, որը հնչում է նաեւ ռեժիսորի համանուն ֆիլմում, ի նշան հայ ժողովրդի հանդեպ ունեցած երախտագիտության եւ հարգանքի, ռեժիսորը անակնակալ կատարեց Փարաջանովյան թալեր ստանալիս եւ լրագրողների հետ հանդիպման ժամանակ:
Գոհար ՀԱԿՈԲՅԱՆ
