Արդեն տեղեկացրել ենք, որ Քաշաթաղում ականի պայթյունից տուժած ՀՀ 3 քաղաքացիներից Գառնիկ Ավետիսյանին, որը սրունքի բաց կոտրվածք էր ստացել «Էրեբունի» բժշկական կենտրոնում վիրահատում են: Հիվանդանոցից Aravot.am-ին հայտնեցին, որ Ավետիսյանի վիրահատությունը բարեհաջող է ավարտվել, նա եւ մյուս տուժածները դեռեւս վերակենդանացման բաժանմունքում են:
Հիշեցնենք, որ ականապատ տարածքում հայտնված ավտոմեքենան պայթել է, ինչի հետեւանքով տուժել են ՀՀ 3 քաղաքացիներ, որոնցից մեկը Արմավիրի քաղաքապետ Ռուբեն Խլղաթյանն է, իսկ մեքենայի վարորդը մահացել է: Մյուս տուժածը` Արթուր Բաղդասարյանը ողնաշարի կոտրվածք ունի, սակայն նրան առայժմ չեն պատրաստվում վիրահատել: Իսկ Արմավիրի քաղաքապետ Ռուբեն Խլղաթյանին, ինչպես հայտնել ենք ավելի վաղ, վիրահատել են ձեռքի 5-րդ կոտրված մատը:
Հիշեցնենք նաեւ, որ ականի պայթյունից նրանց մոտ հայտնաբերվել են պոլիտրավմաներ, այսինքն` մանր վնասվածքներ, ոտքի սրունքի բաց կոտրվածքներ, ուղեղի արնազեղում եւ սալջարդ, ողնաշարի կոտրվածք: Արմավիրի քաղաքապետ Ռուբեն Խլղաթյանի մոտ ուղեղի սալջարդ եւ արնազեղում է հայտնաբերվել, ինչպես նաեւ դեմքի բազմաթիվ վերքեր:
Կարդացեք նաև
Նելլի ԲԱԲԱՅԱՆ
