60-ամյա Սաքոն Հալեպում ավտոմեքենայի վերանորոգման բիզնես ուներ՝ 15 աշխատողներով: Նա բավական գումար ուներ, որպեսզի, ինչպես ինքն է ասում, Հալեպում գներ չորս բնակարան և երկու ավտոմեքենա ու պարբերաբար այցելել քաղաքի թանկ ռեստորաններ: Սակայն պատերազմը կործանեց նրա բիզնեսը և նա ստիպված եկավ Երևան, որտեղ տարիներ առաջ իր որդուն ուղարկել էր դեղագործության ոլորտում ուսում ստանալու: Գրում է «Էյ Բի Սի»-ն:
Այժմ նա Երևանի կենտրոնում վարձակալել է փոքրիկ կրպակ, որտեղ նա արագ սնունդ է պատրաստում ու վաճառում, իսկ նրա կինը, որը մասնագիտությամբ անեսթեզիոլոգ է, այդ կրպակի հարևանությամբ մեկ այլ կետ է աշխատեցնում: Երևանում նրանք ընտանիքի մյուս անդամների հետ ապրում են մեկ սենյականոց բնակարանում: Այլևս չկան լավ ավտոմեքենաները, ռեստորանները և չունեն աշխատողներ:
«Սա նման է արքայական ապրելակերպից գնչուական ապրելակերպին անցնելը», – ասում է նա:
«Ես Հալեպը լքել եմ երկու տարի առաջ և միանգամից եկել Հայաստան, 2012թ. սեպտեմբերի 11-ին էր: Մենք շատ լավ էինք ապրում: Հալեպում չորս բնակարան ունեինք: Բիզնեսը շատ լավ էր ընթանում: Եվ այն լավ էր նույնիսկ հակամարտությունը սկսվելուց հետո: Բայց երբ պատերազմը ի վերջ հասավ Հալեպ, այն կանգ առավ: Մինչ Հայաստան գալը 6 ամիս առաջ այն արդեն կանգ էր առել: Իմ տնից մինչև աշխատատեղը 15 կմ էր և ճանապարհը չափազանց վտանգավոր էր: Չեմ կարող ճշգրիտ տվյալներ ասել, բայց շահույթս 93%-ով անկում էր ապրել: Այնտեղ ունեի 15 աշխատող: Այստեղ միայն ես եմ:
Կարդացեք նաև
Ես երկու մեքենա ունեի՝ Հյունդայի Սոնատա և Կիա: Առնվազն շաբաթը մեկ անգամ գնում էինք որևէ լավ ռեստորան և մշակութային միջոցառումների», – պատմում է Սաքոն՝ նշելով, որ մինչ Երևան գալը իրենք դիմել էին Հայաստանի անձնագրեր ստանալու համար, հետո եկել էին այստեղ փաստաթղթեր ստորագրելու, սակայն Հալեպում իրավիճակն ավելի էր վատացել ու նրանք չկարողացան հետ գնալ:
Պատրաստեց Հովհաննես ԻՇԽԱՆՅԱՆԸ
