Քաշաթաղում տեղի ունեցած ողբերգական դեպքի` ականի վրա մեքենայի պայթյունից 3 վիրավորներից մեկի` Արմավիրի քաղաքապետ Ռուբեն Խլղաթյանի բազմաթիվ վնասվածքներից առայժմ նրա ձեռքի 5-րդ մատի կոտրվածքն են վիրահատել: Այս մասին մեզ տեղեկացրին «Էրեբունի» բժշկական կենտրոնից: Վիրավորված մյուս անձանց վիճակն առայժմ կայուն ծանր է, բժիշկները հետեւում են նրանց առողջական վիճակին:
Ականի պայթյունից մահացած վարորդը, ինչպես Aravot.am-ին հայտնեցին քաղաքապետի մտերիմներից, ամուսնացած էր, ուներ 3 երեխա, որոնցից մեկն` անչափահաս: Քաղաքապետը գտնվում էր արձակուրդում, մեքենայի մյուս ուղեւորները Արմավիրի քաղաքապետարանի աշխատակիցներ չէին, նրանք որոշել էին մեկնել Արցախ` շրջագայության:
«Էրեբունիից» մեզ հայտնեցին, որ վիրավորներն են՝ 53-ամյա Արթուր Բաղդասարյանը, 43-ամյա Գառնիկ Ավետիսյանը, եւ Արմավիրի քաղաքապետը՝ 54-ամյա Ռուբեն Խլղաթյանը:
Նելլի ԲԱԲԱՅԱՆ
Լուսանկարը՝ Գագիկ Շամշյանի/www.shamshyan.com
