Գիտնականներ Ռուբեն Համբարձումյանն ու Արտակ Համբարյանն առաջարկում են Արագած լեռան ձյունը պահպանել՝ ջրային պաշարները ապահովելու համար: Ըստ գիտնականների՝ այսօր մի շարք զարգացած երկրներում, լեռնային շրջաններում ձյան շերտը ծածկվում է հատուկ սինթետիկ գորգով, որը ոչ միայն չի թողնում ձյունը հալչի, գոլորշիանա, այլեւ ջրային պաշար է հանդիսանում տվյալ երկրի գյուղատնտեսության համար:
Այսօր «Էկոլուր» ակումբում, գիտնականները եւ «Հանուն կայուն մարդկային զարգացման» հ/կ-ի նախագահ Կարինե Դանիելյանը թվարկեցին ձյան ամբարների առավելությունները:
Տիկին Դանիելյանը, սակայն, հայտնեց, որ այս հարցը կառավարության աշխատակազմի ղեկավար Դավիթ Հարությունյանի մոտ քննարկելիս, բնապահպանության նախարարության ներկայացուցիչները մտահոգություն են հայտնել՝ ասելով, որ ձյան հալքը հետաձգելով, հնարավոր է՝ վնաս հասցվի էկոհամակարգին: Սակայն միջազգային փորձը, գիտնականների վստահեցմամբ, դրական է:
Ակադեմիկոս Ռուբեն Համբարձումյանի խոսքերով, Արագածը մի շրջան է, որը պատասխանատու է Հայաստանի ջրի 30 տոկոսի համար եւ Արագածի ձյունը չափից դուրս արագ է հալվում, ուստի գյուղատնտեսական սեզոնը չի համընկնում ձնհալքի հետ: Ըստ գիտնականի, լավ կլիներ, որ այդ հալքը մեկ-երկու ամսով դանդաղեցնել այս նոր մեթոդով եւ ապահովել գյուղացու կարիքները:
Կարդացեք նաև
Կարինե Դանիելյանի խոսքերով, ձյունն ամբարելու առավելություններից է նաեւ գարնան սեզոնին սելավների կանխարգելումը:
Գիտնական Արտակ Համբարյանի ներկայացմամբ, այդ գեոտեքստիլ գորգը թույլ է տալիս անդրադարձնել արեւի ճառագայթները, ջերմամեկուսիչ է եւ ձյան շերտը պաշտպանում է քամուց: Ըստ նրա, եթե հնարավոր լինի կազմակերպել այդ գորգի արտադրությունը Հայաստանում, ապա, բացի այն, որ աշխատատեղեր կբացվի, մեր երկրում կլուծվի նաեւ ջրի խնդիրը. «Երկրագնդի վրա տասը խոշոր խնդիրներից մեկը ջրի խնդիրն է»:
Կարինե Դանիելյանի խոսքերով, ձյուն կուտակելով՝ չի նշանակում, որ ջրամբարները պետք է վերանան, ընդհակառակը՝ դրանք մեկը մյուսին լրացնող ջրային պաշարներ են:
Գիտնականները Արագած լեռան վրա 4-5 տարի առաջ 200 քմ-ի վրա կատարել են: Ըստ տիկին Դանիելյանի, ջրամբարներ կառուցելն ավելի ծախսատար է, քան այս եղանակով ջրային պաշարներ կուտակելը:
Լուսանկարը՝ «Էկոլուրի»
Լուսինե ԲՈՒԴԱՂՅԱՆ
Գիտնականները Արագած լեռան վրա 4-5 տարի առաջ 200 քմ-ի վրա կատարել են: ?????????
Այո, այսօր «Էկոլուր» ակումբում այդ մասին վկայեցին փորձ կատարած գիտնականները: Այդ փաստը հավաստող լուսանկար էլ կա նյութում: