Լեւոն Հայրապետյանի պաշտպան Ռուբեն Մարգարյանը երեկ պատասխանելով «Ժամանակի» հարցին, թե այս փուլում ո՞րն է լինելու պաշտպանական կողմի գլխավոր խնդիրը, ասաց որ պաշտպանական կողմն արդեն սկսել է պաշտպանությունը՝ կենտրոնանալով Լեւոն Հայրապետյանի նկատմամբ կիրառված ապօրինի խափանման միջոցը՝ կալանքը, փոխելու վրա:
Ռուբեն Մարգարյանը նաեւ նշեց, որ արդարադատությունից դժվար է խոսել, երբ տնտեսական հոդվածներով մեղադրվողի նկատմամբ որպես խափանման միջոց ընտրվում է կալանքը։ «Ինչ վերաբերում է հետաքննությանը, ապա այստեղ խոսել արդարադատության մասին՝ վաղ է, քանի որ հետաքննությունը արդարացի լինելու խնդիր չունի, հետաքննությունը հետաքննում է քրեական գործը։ Համոզմունք ունեմ, որ Հայրապետյանին կալանքի տակ առնելու որոշումը ճիշտ չէր։ Ես համաձայն չեմ այդ որոշման հետ, քանի որ գործի այն նյութերը, որոնք ներկայացվել են դատարանին, կալանք չէին ենթադրում, հիմք չկար այդ հանցագործությունում նրա մասնակցության վերաբերյալ։ Ես արդեն հոգնել եմ մեկնաբանել դատարանի գործողությունները, երբ դատարանը, չնայած միջնորդություններին, որպես խափանման միջոց կիրառում է կալանքը։ Նույնիսկ բժշկական եզրակացությունների կամ այլ ապացույցների առկայության դեպքում, երբ որպես խափանման միջոց կարելի է կիրառել գրավը կամ տնային կալանքը, ցավոք՝ 99% դեպքերում Մոսկվայում դատարանը որպես խափանման միջոց ընտրում է կալանքը։
Սա միտում է, վիճակագրություն, Հայաստանում եւս այդպես է 94.9% դեպքերում։ Ուստի այս պայմաններում խոսել արդարադատության մասին՝ հնարավոր չէ»,- ասաց նա։
Եզրափակելով՝ փաստաբանն անդրադարձավ նաեւ խոսակցություններին, թե Լեւոն Հայրապետյանի հետ կատարվածը քաղաքական ենթատեքստ ունի՝ ասելով, որ ինքը քաղաքական ենթատեքստ չի տեսնում։
Արաքս ՄԱՐՏԻՐՈՍՅԱՆ
Հոդվածն ամբողջությամբ կարող եք կարդալ «Ժամանակ» թերթի այսօրվա համարում
Կարդացեք նաև
