«Փորձագետների կարծիքով քաղաքացիական նախաձեռնությունները ՀՀ-ում աշխուժացան 2008 թվականի նախագահական ընտրություններից հետո: Սա բեկումնային փուլ էր ամեն դեպքում»:
Այդ մասին այսօր ժուռնալիստների «Ասպարեզ» ակումբի հիմնադրած Վանաձորի քաղաքացիական երիտասարդական կենտրոնում «Քաղաքացիական նախաձեռնությունները և շարժումները Հայաստանում» թեմայով հրավիրված դասընթացի ժամանակ ասաց Քաղաքացիական պայմանագիր, Թրանսփարենսի ինթերնեյշնլ հակակոռուպցիոն կենտրոնից Լենա Նազարյանը:
Նա նշեց, որ փորձագետները հայաստանյան քաղաքացիական նախաձեռնությունների զարգացման երեք կարեւոր գործոն են առանձնացնում:
«Փորձագետները երեք կարեւոր գործոն են նշում: Առաջինը` սերնդափոխությունը: Հետխորհրդային Հայաստանում ձեւավորված նոր սերունդը ձերբազատված էր խորհրդային կարծրատիպերից, մտածողությունից, եւ իսկապես, ես կարծում եմ` դա շատ կարեւոր հանգամանք էր: Երկրորդը նոր տեխնոլոգիաների զարգացումն է: Հայաստանի պարագայում առանձնանում է facebook-ը եւ youtube-ը: Նոր տեխնոլոգիաները իսկապես շատ օգնեցին, որպեսզի քաղաքացիական նախաձեռնությունները ինքնակազմակերպվեն: Եվ երրորդ գործոնը գլոբալ միտումներն են. աշխարհում սոցիալական շարժումների ակտիվացում է նկատվում»,-նշեց Լենա Նազարյանը:
Կարդացեք նաև
Դասընթացի մասնակիցներին ներկայացվեց հայաստանյան քաղաքացիական նախաձեռնություններից յուրաքանչյուրի առանձնահատկությունները, նրանց կարեւորությունը խնդիրների լուծման ճանապարհին:
«Քաղաքացիական նախաձեռնություններից որոշներ արդեն ավարտված են դրական ելքով, որոշները դեռ ընթացքի մեջ են, մի քանիսն էլ այնքան նոր են, որ մենք մասնակցում ենք նրանց ստեղծմանը: Նախաձեռնություններից յուրաքանչյուրն ինչ-որ իմաստով կարեւոր է եղել քաղաքացի լինելու մշակույթը զարգացնելու համար,-նշեց Լենա Նազարյանը:
«Քաղաքացիական նախաձեռնությունները և շարժումները Հայաստանում» թեմայով դասընթաց տեղի կունենա նաեւ ժուռնալիստների «Ասպարեզ» ակումբի մյուս երեք կենտրոններում` Գյումրիում, Արմավիրում եւ Գավառում:
Անուշ ԲՈՒԼՂԱԴԱՐՅԱՆ
