«Նախկին բնապահպանության նախարարը աշխատեց 7 տարի, եւ 7 տարվա ընթացքում, փաստորեն, նախարարության թույլտվությամբ Արարատյան դաշտի ստորգետնյա դաշտի ջրային ավազանը աղետալի վիճակի է բերել»,- այսօր` հուլիսի 21-ին, ասաց «Էկոլուր» հասարակական կազմակերպության նախագահ Ինգա Զառաֆյանը:
Նրա խոսքերով` բնապահպանները բազմաթիվ նամակներ են ուղղել բնապահպանության նախարարությանը եւ ոչ մի պատասխան չեն ստացել: Իսկ հեռուստաընկերություններից մեկով, երբ փորձել են այդ հարցը բարձրաձայնել, նախարարության կայքից մոնիթորինգն անհետացել է.
«Այսինքն`ինչ-որ խաղ է գնում ջրի կառավարման հետ եւ տվյալները փորձում են մեզնից փակել, միեւնույն է չեն կարող փակել»:
Տիկին Զառաֆյանը համարում է, որ Հայաստանում ձեւավորվել է անկառավարելի վիճակ, որը հղի է մեծ վտանգով, քանի որ ջուրը ռազմական պաշար եւ քաղաքական գործոն է համարում, եւ ըստ նրա, եթե ինչ-որ մեկը ցանկանա ջուրն իր ձեռքում հավաքել, ապա Հայաստանը կկանգնի լուրջ վտանգների առաջ:
Կարդացեք նաև
«Թեղուտի պաշտպանություն» քաղաքացիական նախաձեռնության անդամ Արթուր Գրիգորյանը հայտարարեց, որ մասնագետները պետք է անհատական պատասխանատվություն կրեն իրենց տված եզրակացությունների համար: Նրա կարծիքով` Սեւանը ճահճանում է, որովհետեւ, երբ որ Սեւանի ջուրը բարձրանում է, պետք է հողաշերտ մաքրել, քանի որ դա օրգանական հատված է եւ ձուկ պետք է լինի, որ դա ուտի, որպեսզի ճահճացման չհանգեցնի.
«Երբ որ Սեւանի ջուրը բարձրանում էր, հազար ու մի ծրագրերով ստացել են ֆինանսավորում, որպեսզի այդ հողաշերտը մաքրեն: Այդ ֆինանսավորումը ղեկավարվել է Վիկտոր Մարտիրոսյանի ղեկավարած ԾԻԳ-ի կողմից: Ովքե՞ր են մեղավոր սրա համար, Արամ Հարությունյան, Վիկտոր Մարտիրոսյան, էլ ովքե՞ր: Ձկնապաշարների հարցով` Արամ Հարությունյան, դրանից առաջ Վարդան Այվազյան, Արտաշես Զիլոյան, հանքարդյունաբերության ոլորտ` Հովհաննես Նիկողոսյան եւ այլ մարդիկ»:
Ամի ՉԻՉԱԿՅԱՆ
