Ի՞նչ կարելի է անել դդմիկների հետ՝ բացի տապակելուց եւ կոտլետ պատրաստելուց: Կարելի է լցոնել մսով եւ շատ համեղ տոլմա կդառնա, կարելի է շոգեխաշել եւ պյուրե պատրաստել՝ մի քիչ սխտոր եւ կարագ ավելացնելով… բայց այսօր ես կառաջարկեմ ավելի հետաքրքիր մի բան՝ դդմիկով կարկանդակ՝ գինու եւ գարեջրի հետ հրաշալի նախուտեստ, որը նաեւ շատ լավ տարբերակ է նախաճաշի, պիկնիկների եւ ընդմիջման համար աշխատավայր վերցնելու համար:
Անհրաժեշտ մթերքները
Դդմիկ- 4-5 հատ
Ձու- 3 հատ
Կաթ- 0,5 բաժակ
Կաթնաշոռ- 1 տուփ
Պարմեզան- 50 գրամ
Որեւէ այլ պանիր՝ «չանախ»-ից սկսած «էդամ»-ով վերջացրած՝ 100 գրամ
Ալյուր-2-3 բաժակ,
Սոդա- 1 թեյի գդալ
Բուսական յուղ-3 ճաշի գդալ
Թարմ եւ չորացրած կանաչիներ (թարմ սամիթը եւ չորացրած ծիթրոնը կամ հազրեվարդը՝ ռոզմարինը, շատ հարմար են), այլ համեմունքներ (օրինակ՝ կծու կարմիր պղպեղ)
Պատրաստման եղանակը
Դդմիկը քերիչով քերել (ի դեպ, կարող եք դդմիկի հետ կամ դդմիկի փոխարեն վերցնել «ցուկինի»՝ մուգ կանաչ, գրեթե սեւ կեղեւով դդմիկը, որը պակաս ջրալի է եւ ավելի գեղեցիկ է նայվում խմորի մեջ), լցնել թանզիֆի (марля) մեջ, եւ լավ քամել, որպեսզի որքան հնարավոր է շատ ջուր միջից դուրս գա:
Կարդացեք նաև
Առանձին ամանի մեջ հարել ձվի դեղնուցը, բուսական յուղը, կաթը, սոդան ալյուրը, ավելացնել կաթնաշոռը, քերած պանիրները եւ ջրքամած դդմիկը, կրկին հարել: Առանձին հարել սպիտակուցը, քիչ քիչ ավելացնել խմորին, որի մեջ նաեւ կանաչիներն ու համեմունքներն են լցրած:
Ջեռոցի թավան, որը կարող է լինել եւ կերամիկական, եւ թիթեղյա, եւ ապակուց, լավ կարագոտել, խմորը լցնել մեջը, դնել նախապես 180 աստիճան տաքացրած ջեռոցը: Մոտ մեկ ժամ պետք է թխվի: Խմորը լավ կբարձրանա՝ հարած սպիտակուցի եւ սոդայի հաշվին, սակայն սառելուց հետո կնստի, չտխրեք:
Անպայման թողեք լավ սառչի, նոր կտրեք, այլապես միջի կաթնաշոռը եւ պանիրը կհոսեն:
Բարի ախորժակ:
Պատրաստեց
ՄԵԼԱՆՅԱ ԲԱՐՍԵՂՅԱՆԸ
«Առավոտ»,
19.07.2014
