Էլեկտրաէներգիայի սակագների թանկացման դեմ ՕԵԿ-ի հրավիրած հանրահավաքում Հովհաննես Մարգարյանն ասաց, որ իրենք արձակուրդ գնալու մասին չեն մտածում, քանի որ մինչեւ վերջ պայքարելու են օգոստոսի 1-ից նախատեսվող առանց այդ էլ թանկ էլեկտրաէներգիայի սակագների բարձրացման դեմ:
«Օրինաց երկիրը» երկրորդ հայցն է ներկայացրել վարչական դատարան, որովհետեւ առաջինն անհիմն մերժվեց: Մենք բողոք դիմում ենք ներկայացրել սակագները կարգավորող հանձնաժողովին, որպեսզի վերանայեն գազի արդեն գործող սակագինը եւ էլեկտրաէներգիայի սակագնի թանկացման որոշումը: Սակագները կարգավորող հանձնաժողովում, որի հինգ անդամներից ոչ մեկը, չեմ հիշում, որ տարիներ շարունակ որոշումներ կայացնելիս ձեռնպահ մնացած լինի, մեզ ասում են՝ ճեղքվածքի մասին ու թանկացումը անհրաժեշտ համարում: Ի՞նչ ճեղքվածք: Գնացեք այդ ճեղքվածքները փակեք: Դա վատ կառավարման արդյունք է: Դա, «լեվի» են ասում, ինչ են ասում, վաճառված էլեկտրաէներգիան է, գազը՝ ինչ կորուստների մասին են խոսում: Թող իրենց շահույթը քչացնեն: Մեկ տարվա մեջ պակասել է սպառումը, բայց հազար հոգով ավելացել է աշխատողների թիվը: Մենք աշխատատեղերի ավելացումը կողջունեինք, բայց դրանով չեն բավարարվել՝ կրկնապատկել են աշխատավարձը: 119 հազար միջին աշխատավարձը մեկ տարվա ընթացքում դարձրեցին 230 հազար: Դա թող լինի շահույթի հաշվին՝ մեր եւ ձեր հաշվի՞ն պետք է լինի… Սեւանից ջուր է բաց թողնվում Արարատյան դաշտավայրը ոռոգելու նպատակով, որպեսզի գյուղացի իր օրվա հացը վաստակի: Բայց մինչեւ գյուղացուն հասնելը այդ ջուրը էլեկտրաէներգիա է դառնում: Որտե՞ղ է դա, որտե՞ղ են այդ միլիարդները: Թող փակեն այդ ճեղքվածքները, այլ ոչ թե Ծաղկաձորում հինգ աստղանի պանսիոնատ կառուցեն: Ես ստիպված իմ գործընկերների հետ պատրաստել եմ օրենքի նախագիծ, որը կոչվելու է կշտանալու մասին օրենք: Չգիտեմ, մի ձեւ գտնենք, որպեսզի այդ անկուշտները մի ձեւով բավարարվեն: Հազարավոր երեխաներ սոված են քնում: Ինչ է լինելու, եթե այս թանկացումը թույլ տանք: Չենք թույլ տալու», – ասաց Հովհաննես Մարգարյանը:
Աշոտ ՀԱԿՈԲՅԱՆ
