«Լեւոն Հայրապետյանը շատ պիտանի մարդ է Լեռնային Ղարաբաղի հարցում»,- այսօր` հուլիսի 18-ին, «Հայելի» մամլո ակումբում լրագրողների հետ հանդիպման ընթացքում հայտարարեց գրող Դավիթ Հովհաննեսը:
Նա նշեց, որ Լեւոն Հայրապետյանը հայ ժողովրդին պատիվ բերող այն մեծահարուստներից է, ում չի սազում օլիգարխ անվանումը:
Պարոն Հովհաննեսը համոզմունք հայտնեց, եթե Լեւոն Հայրապետյանն այդպիսի կասկած ունենար, թե իրեն կձերբակալեն, ոտքն իսկ Ռուսաստանում չէր դնի.
«Մարդը հանգիստ խղճով նստել է ինքնաթիռ, գնացել է Մոսկվա: Ես չեմ ուզում խորանալ այս դատողությունների մեջ, չգիտեմ, ոչ մի տեղեկություն չկա` քննչական մարմինները ոչինչ չեն հայտարարում, միայն ադրբեջանական թեքում ունեցող մի գործակալություն է գրում` հայ գործարարի են բռնել, որը Ղարաբաղի հարցում զենք է մատակարարում: Այդ բոլորը ճիշտ է, դուք ինչո՞ւ եք ուրախացել»:
Դավիթ Հովհաննեսը չի ցանկանում մտածել, որ Լեւոն Հայրապետյանի ձերբակալությունը ադրբեջանական եւս մեկ դիվերսիա է: Ավելին` նա համարում է, որ նրան ձերբակալել են դաս տալու համար.
«Մեծ շրջապատ ունի նա, պատահական չեն տրվում Չեռնոմիրդինի, Լավրովի անունները, ինքն էլ օրիգինալ մի տիպ է, նրան վախեցնելը շատ դժվար է, իհարկե’, կլուծվի այս թնջուկը: Ես կարծում եմ` նա ազատ կարձակվի, եթե, իհարկե’, մտադիր չեն այս ակցիան իրականացնողները այդ դաս տալու գործընթացը շարունակել ` լավ դաս տալ: Սա դաս է ե’ւ Հայաստանին, որ մի’ բողոքեք, որ Ադրբեջանին զենք ենք վաճառում, սա դաս է Հայաստանին այս Մաքսային միության չարաբաստիկ հարցերում: Ըստ երեւույթին, խոչընդոտները միայն մաքսային եռյակի կողմից չէ, խոչընդոտում են նաեւ Հայաստանի կողմից` իրենց շահերից ելնելով»:
Կարդացեք նաև
Ամի ՉԻՉԱԿՅԱՆ
