Վրաստանի նախկին նախագահ Միխեիլ Սահակաշվիլին անդրադարձել է երեկ Ուկրաինայում կործանված «Բոինգ-777» օդանավի դեպքին և քննադատել Եվրոպային, որ Ռուսաստանի դեմ համապատասխան միջոցներ չեն ձեռնարկում, փոխանցում է «Գրուզիա Օնլայն»-ը:
«Երեկ Եվրամիությունը կրկին չկարողացավ պայմանավորվել լուրջ, այսինքն՝ ճյուղային պատժամիջոցների հարցում: Երեկ ողջ-ողջ մարդկանցով ինքնաթիռն ընկավ երկնքից: Սակայն այս ողբերգությունը երկնքից չի ընկել, այն երկար ժամանակ էր պատրաստվում: Եվրոպայի աչքի առաջ զրահապատ ռազմական մեքենաները և հակաօդային պաշտպանության զենքերը հատում են ինքնիշխան Ուկրաինայի սահմանը, որն ամենամեծն է եվրոպական տերություններում, իսկ Եվրոպան առանց ամոթի նախընտրում է այլ ուղղությամբ նայել», – ասել է Սահակաշվիլին Ֆեյսբուքի իր էջում՝ հիշեցնելով, որ երբ Ռուսաստանը ռմբակոծում էր Գորին, ինչի հետևանքով հոլանդացի լրագրող մահացավ, նրա գործընկերը, դատապարտելով Ռուսաստանին, լրագրողի մահվան մեջ մեղադրում էր Վրաստանին՝ ասելով, որ Վրաստանն իր դիմադրությամբ Ռուսաստանին դրդել է ռմբակոծության, – «Իհարկե գլխավոր մեղավորը նստած է Կրեմլում, բայց առանց Բեռլինի, Բրյուսելի, Հռոմի և իր այլ մեղսակիցների այդ կրեմլյան սատակը դժվար թե դուրս գար ամենօրյա արյունալի որսի»:
Ինքնաթիռի վթարից զոհվել է 298 հոգի: Դեռևս հաստատված չէ, թե արդյոք ինքնաթիռը հրթիռի հարվածից է կործանվել:
Պատրաստեց Հովհաննես ԻՇԽԱՆՅԱՆԸ
Կարդացեք նաև
