Ուկրաինական զարգացումների համատեքստում՝ պատասխանելով Հայաստանը դեպի Եվրոպա էներգակիրների տարանցիկ ճանապարհ դարձնելուն վերաբերվող հարցին, այսօր Մամուլի ազգային ակումբում ՀՀ-ում Իրանի Իսլամական Հանրապետության արտակարգ եւ լիազոր դեսպան Մոհամմադ Ռեյիսին ասաց, որ Հայաստանի տարածքով էներգակիրների տարանցման համար անհրաժեշտ է համապատասխան ենթակառուցվածք: «Մենք ՌԴ-ի հետ ունենք լավ հարաբերություններ: Երկու երկրներ ենք, որոնք կարող են էներգակիրների, հատկապես գազի ոլորտում լավ համագործակցել»,- ասաց դեսպանը:
Դիտարկմանը`պաշտոնական Երեւանից նման ցանկություն, նախաձեռնություն չկա՞, դեսպանն արձագանքեց. «Ինչպես նշեցի, անհրաժեշտ է համապատասխան ենթակառուցվածք, իսկ ՀՀ կառավարությանն անհրաժեշտ է համապատասխան ժամանակ»:
Իրան-Հայաստան գազամուղին վերաբերվող հարցին էլ, դեսպանն ասաց. «Գազամուղը, երբ նախագծվել եւ որոշում է կայացվել կառուցելու, գուցե այն ժամանակվա համար է եղել այդ չափը: Սակայն, այժմ այդ տրամաչափով հնարավոր չէ տարանցում իրականացնել: Եթե ստեղծվի համապատասխան տրամաչափի խողովակաշար, որեւէ խնդիր չկա Հայաստանի միջոցով գազ տարանցելու»:
Դեսպանն ասաց, որ մեկ երկաթգծի կառուցման համար 3-4 միլիարդ դոլարի ներդրում է անհրաժեշտ: Նույնը`նաեւ գազամուղի հետ կապված:
Կարդացեք նաև
Թեմայի շուրջ հնչած մնացյալ բոլոր հարցերի պատասխանները դեսպանը հորդորեց ստանալ ՀՀ կառավարությունից: Հարցերը վերաբերվում էին «ՀայՌուսգազարդի» 20 տոկոս բաժնեմասի`«Գազպրոմին» վաճառքից հետո առաջացած իրավիճակին:
«Մենք ՀՀ-ի հետ ունենք շատ լավ հարաբերություններ: Մինչ այժմ տեղի են ունեցել միջկառավարական հանձնաժողովի 11 նիստեր: Շուտով Թեհրանում տեղի է ունենալու նաեւ 12-րդ նիստը: Մինչ նիստի գումարումը ՀՀ էներգետիկայի նախարարը պետք է այց ունենա Իրան: Գուցե այդ խնդիրներն այնտեղ այցի շրջանակներում քննարկվեն: Մենք մշտապես հայտարարել ենք, որ պատրաստ ենք Հայաստանի հետ բոլոր ոլորտներում համագործակցել»,- ասաց դեսպանը:
Ներդրումների մասին խոսելիս՝ դեսպանն ասաց, որ անհրաժեշտ է համարում, որ համապատասխան օրենքներն ավելի պարզեցվեն, մաքսային խնդիրները դյուրացվեն, համապատասխան իրավական դաշտ ստեղծվի, որը ֆինանսական ապահովություն կխոստանա:
Նելլի ԳՐԻԳՈՐՅԱՆ
