Կյանքից հեռացավ ՀՀ ժողովրդական նկարիչ Հենրիկ Մամյանը

Հուլիսի 17-ին, 80 տարեկանում կյանքից հեռացավ ՀՀ ժողովրդական նկարիչ Հենրիկ Արամի Մամյանը:

Հենրիկ Մամյանը ծնվել է 1934 թվականի ապրիլի 24-ին Երևանում: Ավարտել է Երևանի գեղարվեստի ուսումնարանը (1953 թ.), այնուհետև` Երևանի թատերական ինստիտուտը (1959 թ.):

Հենրիկ Մամյանը ճանաչված և սիրված արվեստագետ էր, մանկավարժական աշխատանքի մեծ փորձ ունեցող հմուտ մասնագետ: 1960 թ. դասավանդել է Երևանի պոլիտեխնիկական, գեղարվեստաթատերական ինստիտուտներում, Ճարտարապետության և շինարարության Հայաստանի ազգային համալսարանում` 1991-2006 թթ. «Գծանկարի, գունանկարի և քանդակի» ամբիոնի վարիչ էր, մինչև օրս՝ ամբիոնի պրոֆեսոր:

Հ. Մամյանը ստեղծագործել է հիմնականում գրաֆիկայի ոլորտում: Գրքի նրա ձևավորումներից են Եղիշե Չարենցի «Ամբոխները խելագարված» (1968-77 թթ.), Լևոն Շանթի «Հին աստվածներ» (1969-74 թթ.), Դանիել Վարուժանի «Հարճը» (1979 թ.), Աստվածաշունչ մատյանից՝ «Երգ երգոց Սողոմոնի» (1992 թ.), Ավ. Իսահակյանի «Աբու-լալա Մահարի» (1987 թ.), Հովհ. Թումանյանի «Անուշ» (1987-2005 թթ.), «Գիրք Դավիթ Սաղմոսացի» (2003-2004 թթ.) և այլն:

Հաստոցային գրաֆիկական գործերից են «Ձմեռ» (1981 թ.), «Լուսին» (1983 թ.), «Հայ ժողովրդի պատմությունից» նկարաշարը (1996 թ.):

Հեղինակ է նաև բազմաթիվ մատենանիշերի, մոնումենտալ և բնագիր աշխատանքների (Օշականի Մեսրոպ Մաշտոց եկեղեցու որմնանկարները, Հ. Մինասյանի և Գ. Խանջյանի «Վարդանանք» եռանկարի երրորդ մասի որմնանկարները` Երևանի Կասկադում):

Նկարիչը բազմաթիվ անհատական ցուցահանդեսներ է ունեցել Մոսկվայում, Բաքվում (1975 թ.), Կիրովականում (1980 թ.), Գյումրիում, Երևանում (1981 թ., 1985 թ., 2004 թ.), Վարշավայում (1984 թ.), Բելգրադում (1991 թ.) և այլուր:

Հենրիկ Մամյանի արվեստին բնորոշ են բարձր պրոֆեսիոնալիզմը, ազգային և համաշխարհային ավանդույթների ստեղծագործական վերաիմաստավորումը:

Տաղանդավոր նկարչի և հրաշալի մարդու հիշատակը միշտ վառ կմնա իր աշխատանքային ընկերների և հայ մշակույթի պատմության մեջ:

Հենրիկ Մամյանի հոգեհանգիստը տեղի կունենա հուլիսի 18-ին, ժամը 18:00-20:00, Կոնդի Սուրբ Հովհաննես եկեղեցում, վերջին հրաժեշտը` հուլիսի 19-ին, Հայաստանի նկարիչների միության շենքում` ժամը 12:00-14:00: Հուղարկավորությունը՝ Երևանի քաղաքային պանթեոնում:

Կառավարական հանձնաժողով