Լրագրողների խնդրանքով ՀՀ պաշտպանության նախարար Սեյրան Օհանյանն այսօր Կենտրոնական հավաքակայանում անդրադարձավ Քարվաճառում ադրբեջանական դիվերսիոն-հետախուզական խմբի վնասազերծման ուղղությամբ իրականացվող գործողություններին ու սպանված 17-ամյա քարվաճառցի Սմբատ Ցականյանին:
«Նախնական վարկածը բերում է նրան, որ վերջին ձերբակալված դիվերսիոն խմբի անդամն է իրականացրել այդ սպանությունը, բնականաբար Լեռնային Ղարաբաղի Հանրապետության իրավապահ մարմիններն իրենց վարույթում ունեն քրեական գործ, որի ընթացքում կպարզվի ամեն ինչ»,-ասաց Սեյրան Օհանյանը:
Պատասխանելով «Ազատություն» ռ/կ-ի հարցին՝ ճի՞շտ է, որ առանձնակի դաժանությամբ են սպանել պատանուն, դրա համար էլ փակ դագաղով են հուղարկավորել, պաշտպանության նախարարը պատասխանեց. «Այդ մասին պետք է հարցնել իրավապահ մարմիններին»:
Նա հավելեց, թե ադրբեջանցիները կփորձեն ռազմագերու կարգավիճակ տալ դիվերսիոն խմբի անդամներին, բայց ԼՂՀ եւ Հայաստանի տեսակետը այլ է. «Նրանք վարձկան հանցագործներ են, հանցագործները պետք է պատժվեն Լեռնային Ղարաբաղի Հանրապետության օրենքներով, իհարկե հաշվի առնելով միջազգային հանրության բոլոր նորմերը, իրենք կարող են փաստաբաններ ընտրել: Այն հանցագործները, որոնք անօրեն թափանցել են Լեռնային Ղարաբաղի տարածք, անօրեն սպանություններ են կատարել, վիրավորել մի կնոջ, պետք պատասխան տան հենց այդ երկրի օրենքներով»: Նախարարն ասաց, Քարվաճառում լեռնանտառային պայմանները հնարավորություն են տալիս ներթափանցելու, իսկ Վարդենիս հասել են, թե ոչ ադրբեջանցի դիվերսանտները, կպարզի քրեական գործի ընթացքը:
Գոհար ՀԱԿՈԲՅԱՆ
