Սյունիքի մարզպետարանի կայքը ինֆորմացիայի մատչելիության առումով վերջին տեղում է: Այդպիսի գնահատական են տվել Խոսքի ազատության պաշտպանության կոմիտեի փորձագետները՝ կազմելով պետական մարմինների պաշտոնական կայքերի վարկանիշային աղյուսակը:
Այսօր «Հայացք» ակումբում, այս մասին, հրավիրած ասուլիսում ԽԱՊԿ նախագահ Աշոտ Մելիքյանը նշեց, որ առաջին տեղում Արագածոտնի մարզպետարանն է: Ըստ աղյուսակի, երկրորդ տեղում է Արմավիրի, երրորդ տեղում՝ Լոռու մարզպետարանը:
Սյունիքի մարզպետարանից հետո տեղեկատվությունը մատչելի չէ Շիրակի եւ Տավուշի մարզպետարանների կայքերում:
Իրավաբան Օլգա Սաֆարյանը նշեց, որ այս կամ այն պետական մարմինը շատ դեպքերում ներգրավված է տարբեր դատական վեճերի մեջ. «Երբ մենք ցանկանանք ստանալ տեղեկություններ՝ չենք ստանա, չգիտենք՝ ունի՞ դատական վեճեր, չունի: Եթե որոշ վճիռներ էլ տեղադրված լինեն, չգիտենք՝ այդ գործը հիմա ինչ փուլում է՝ մտե՞լ է օրինական ուժի մեջ, բողոքարկվո՞ւմ է, Վերաքննիչո՞ւմ է, թե՞ չէ»:
Պետական մարմինների կայքերի հետ կապված կառավարության որոշում կա, թե ինչպիսի տեսք պետք է ունենա պետական մարմնի կայքը եւ ինչ բովանդակություն: Այդ որոշումն ուժի մեջ է մտել հուլիսի 1-ից: Պետք է պետական մարմիններն իրենց կայքերը համապատասխանեցնեն այդ որոշմանը:
Կարդացեք նաև
ԽԱՊԿ պետական մարմիններին տրամադրելու է կոդ, որով կարող են մտնել իրենց կայք եւ տեղեկանալ վարկանիշային աղյուսակում իրենց գրաված տեղի, թերությունների, խնդիրների մասին:
Հռիփսիմե ՋԵԲԵՋՅԱՆ
