Քիչ առաջ մեկնարկեց «Դուրս մեր գրպանից» նախաձեռնության վեցերորդ իրազեկման ավտոերթը: Ավտոերթը Նոր Նորքի վեցերորդ զանգվածից շարժվելու է դեպի Քանաքեռ-Զեյթուն թաղամաս, որտեղից էլ Կոմիտասի պողոտայով, Կիեւյան փողոցով շարժվելու է Մալաթիա-Սեբաստիա վարչական շրջան, որտեղից էլ գնալու են Շենգավիթ համայնք, իրազեկման երթն ավարտվելու է Էրեբունի վարչական շրջանում: Ավտոերթն ունի «Չենք վճարում տուգանքները» կարգախոսը:
Նախաձեռնության անդամ Վարդան Հակոբյանը Aravot.am-ի հետ զրույցում հայտարարեց, որ այս երթով նախաձեռնությունը ցանկանում է իրազեկել վարորդներին, որ տուգանքները հնարավոր է բողոքարկել դատարանում: Նրա կարծիքով՝ վարորդները, ստանալով տուգանքի մասին ակտը, համարում են, որ դա հարյուր տոկոսանոց ճշմարտություն է, սակայն փորձը ցույցը տալիս է, որ դա այդպես չէ.
«Փորձը ցույց է տալիս, որ տասից ութ բողոքարկումները վարորդին ազատում են տուգանվելու պարտավորվածությունից, որովհետեւ տուգանքները մեծ մասով գալիս են անօրինական, ծուղակային վիճակներում: Վարորդները տեղյակ չեն, որ իրենք կարող են պաշտպանվել»:
Ավտոերթին մասնակցող մեքենաները դրոշներով շարժվեցին դեպի Քանաքեռ-Զեյթուն վարչական շրջան՝ կոչ անելով վարորդներին միանալ իրենց նախաձեռնությանը եւ չվճարել տուգանքները:
Կարդացեք նաև
Ամի ՉԻՉԱԿՅԱՆ
