Այսօր «Սոցիալական փոփոխությունների կինո» ծրագրի և «Ոսկե Ծիրան» կինոփառատոնի շրջանակներում «Նաիրի» կինոթատրոնում տեղի ունեցավ ռեժիսորներ Ռոբերտո Էռնանդեսի և Ջեֆրի Սմիթի «Ենթադրյալ մեղավորը» ֆիլմի դիտումն ու հանրային քննարկումը: Քննարկմանը մասնակցում էին արտասահմանյան կինոգետներ Ադամ Միխնիկը և Ռիչարդ Պենյան, լրագրող Զարուհի Մեջլումյանը, փորձագետ Ավետիք Իշխանյանը և այլք:
«Ենթադրյալ մեղավորը» մեքսիկացի երիտասարդի կյանքի իրական պատմությունն է, որին անհիմն մեղադրում են մարդասպանության մեջ ու դատապարտում քսան տարվա ազատազրկման: Ի վերջո, համառ ջանքերի շնորհիվ երիտասարդը կարողանում է վերականգնել արդարությունն ու ազատ արձակվել:
Կինոգետ, կինոքննադատ Ռիչարդ Պենյան նշեց, որ մեքսիկացի տղայի օրինակով ֆիլմի ռեժիսորները բարձրաձայնել են կարևոր թեմա, որն արդիական է ոչ միայն Մեքսիկայում, այլև ամբողջ աշխարհում, քանի որ այսօր բանտերում շատերը անարդարացիորեն են կալանավորված, և հենց այդ պատճառով է ֆիլմը լայն տարածում գտել:
Հարցին, թե արդյոք Հայաստանում էլ է հնարավոր նմանատիպ փաստավավերագրական ֆիլմ նկարահանել, փորձագետ Ավետիք Իշխանյանը պատասխանեց. «Հայաստանում ուղղակի հարկավոր է կալանավորների մասին ֆիլմ նկարահանել:Այստեղ ներկայացված ֆիլմում տեսնում ենք, թե ինչպես մի խումբ երիտասարդներ համառության շնորհիվ կարողանում են հասնել լավ արդյունքի, մինչդեռ նման համառությունը պակասում է մեզ՝ հայերիս: Առաջ գնալու համար բավական շատ ռեսուրսներ են պետք. Հայաստանում համեմատաբար պաշտպանված են այն մարդիկ, որոնք քիչ թե շատ ֆինանսապես ապահովված են ու կարող են լավ փաստաբանի դիմել: Իսկ նման հնարավորություն չունեցող հարյուրավոր անձինք այդպես էլ կարող են արդարության չհասնել: Շատերը կասեն, որ այստեղ անհնար է բարձրաձայնել անարդարացիորեն կալանավորվածների թեման.մեզ կլռեցնեն, թույլ չեն տա արխիվային փաստաթղթերը հրապարակել: Իսկ ես կարծում եմ, որ առանց փորձելու պետք չէ հանձնվել: Մենք արդեն իսկ Զարուհի Մեջլումյանի հետ միասին որոշակի քայլեր ձեռնարկում ենք. բարձրաձայնում ենք կալանավորների խնդիրները, հետաքննություն ենք վարում ու արխիվային փաստաթղթեր վերանայում»:
Կարդացեք նաև
Զարուհի Մեջլումյանն էլ հավելեց. «Դատապարտյալների իրավունքներով սկսել եմ զբաղվել ցմահ դատապարտյալների Մհեր Ենոքյանի և Սողոմոն Քոչարյանի երկրորդ փախուստից հետո: Այս միջադեպը ստիպեց լրագրողական հետաքննություն սկսել, արխիվային փաստաթղթերը ուսումնասիրել, ինչի արդյունքում ես իրար հակասող շատ տեղեկությունների հանդիպեցի: Հիմա էլ տարբեր կալանավորների դեպքերով եմ զբաղվում: Իմ՝ «Տասնմեկ ճակատագիր.լսեք մեր ձայնը» անունը կրող ֆիլմաշարում վերջին ամիսներին դատարանական արխիվներում կատարված իմ լրագրողական հետաքննություններն են, որտեղ տեսնում ենք, թե ինչպես է դատարանը, համոզված չլինելով մարդու մեղավորության մեջ, անարդարացիորեն նրան մահապատժի ու ազատազրկման դատապարտել: Նման ֆիլմերն իսկապես կարող են ազդել մարդու կյանքի վրա և ճակատագիր փոխել»:
Սյունե ՍԵՎԱԴԱ
