Ինչպես արդեն տեղեկացրել ենք, «Շանթ Հարությունյան և ընկերներ» գործով դատական նիստը միջադեպի պատճառով ընդմիջվեց: Միջադեպը տեղի ունեցավ այն ժամանակ, երբ գործով տուժող ճանաչված ոստիկան Գեղամ Խաչատրյանը ցուցմունք էր տալիս:
Շանթ Հարությունյանի որդի Շահեն Հարությունյանի պաշտպան Ինեսա Պետրոսյանը նրան հարցրեց՝ ինչու՞ նախօրոք բարձրախոսով կոչ չէին անում, որ Շանթն ու իր ընկերները չանցնեն փողոցը, նա ասաց, թե «Շանթ Հարությունյանը թույլ չէր տալիս»: Շանթ Հարությունյանը պատասխանեց, թե «Արա ե՞ս թույլ չեմ տվել»:
Ընդմիջումից հետո դատավոր Մնացական Մարտիրոսյանը հայտարարեց, թե նախազգուշական սանկցիա է կիրառում Շանթ Հարությունյանի նկատմամբ, ինչը նշանակում է, որ Շանթ Հարությունյանը կշարունակի մասնակցել նիստերին:
Այս հայտարարությունից հետո Շանթ Հարությունյանը ներողություն խնդրեց Մնացական Մարտիրոսյանից, իր խոսքերով «ոչ որպես դատավորից, այլ մարդուց ու քաղաքացուց»:
Դատավորը հայտարարեց, որ ուղեկցող խմբից իրեն տեղեկացրել են, թե նկատել են, որ Շահեն Հարությունյանը ցանկացել է հեռախոս փոխանցել ամբաստանյալներից Վարդան Վարդանյանին, ինչը չէր թույլատրվում: Ուստի դատարանը որոշեց, որ հաջորդ դատական նիստին Շահենը նստելու է ոչ թե ամբաստանյալների կողքին, այլ իր մայրիկի:
Տաթև ՀԱՐՈՒԹՅՈՒՆՅԱՆ
