Այսօր «Ոսկե ծիրան» կինոփառատոնի պատվավոր նախագահ Հարություն Խաչատրյանը իսրայելցի անվանի ռեժիսոր Ամոս Գիտային Փարաջանովյան թալեր հանձնեց՝ համաշխարհաին կինոյում ունեցած ներդրումի համար: Իսրայելցի կինոռեժիսորը հուզվել էր: Նա ասաց, որ իր համար մեծ պատիվ է փարաջանովյան մրցանակ ստանալը. «Փարաջանովը, ում հետ պատիվ եմ ունեցել 90-ականներին հանդիպել Ռոտերդամում, մեծագույն ռեժիսոր է: Նա ապացուցեց, որ պարտադիր չէ հետեւել գոյութուն ունեցող կաղապարներին եւ կարելի է ստեղծագործել ուղղակի հետեւելով սրտի ձայնին ու երեւակայությանը…Բրեսոնի մրցանակ ունեի, Ռուսելինիի մրցանակը՝ նույնպես, Փարաջանովինը հենց նոր ստացա…»,-նշեց իսրայելցի կինոռեժիսորը:
Հավելեց, որ մեծագույն հարգանք ունի հայ ժողովրդի հանդեպ, որը ճակատագրով ու անցյալով ընդհանրություններ ունի իր ժողովրդի հետ: «Հայկական թաղամասը Երուսաղեմի ամենագեղեցիկ հատվածներից է: Ինչ վերաբերում է հայերին ու հրեաներին, երկուսն էլ աշխարհում շատ չեն, բայց մեծ է հայերի ներդրումը համաշխարհային մշակույթում»,-հավելեց արվեստագետը:
Ամոս Գիտայը ժամանակակից իսրայելական կինոյի դեմքերից է, «նոր ալիքի» ձեւավորողներից մեկը: Նա «Ոսկե ծիրանին» ներկայացել է չորս ֆիլմով, որից վերջինը՝ «Անա Արաբիան», 2013-ին Վենետիկի կինոփառատոնում արժանացել է Ժյուրիի հատուկ մրցանակին:
Կարդացեք նաև
Այսօր «Մոսկվա» կինոթատրոնում «Անա Արաբիա» ֆիլմով մեկնարկեց Ամոս Գիտայի ֆիլմերի հետահայաց ցուցադրությունների ծրագրի բացումը: Իսրայելցի ռեժիսորը չներկայացրեց ֆիլմը, ասելով, որ ֆիլմի ցուցադրությունից առաջ այդ մասին երկար խոսելը վտանգավոր է: Ընդամենը հատնեց, որ այն նկարել է Թել Ավիվի ու Ջաֆայի մեջտեղում ընկած հատվածում՝ մեկ նկարահանմամբ, առանց մոտնաժային կտրվածքների:
Իսկ ֆիլմի համառոտ սյուժեն հետեւյալն է. երիտասարդ լրագրող Յաելը հոդված է պատրաստում Օսվենցիմի նախկին գերի՝ ազգությամբ հրեա Հաննայի մասին: Վերջինս ամուսնանալով պաղեստինցու հետ իսլամ էր ընդունել: Անա Արաբիան նրա նոր անունն է, որը թարգմանաբար նշանակում է ՝ «ես արաբ եմ»: Ողջ ֆիլմը կառուցված է այդ ընտանիքի անդամների ու բարեկամների հուշերի վրա: Ֆիլմի ուղերձն այն է, որ քաղաքական կոնֆլիկտները այլ հունով են ընդանում, կյանքը եւ երջանկությունը՝ լրիվ այլ:
«Անա Արաբիա» ֆիլմի ավարտից հետո հանդիսատեսը ի նշան գոհունակության ծափահարեց:
Ընդհանրապես այս տարի «Ոսկե ծիրանի» շրջանակում ցուցադրվող ֆիլմերն անցնում են լեցուն դահլիճներում, հանդիսատեսն իրեն դուր եկած բարձրակարգ ֆիլմերի ավարտին մշտապես ծափահարում է:
Գոհար ՀԱԿՈԲՅԱՆ
