Այսօր «Ոսկե Ծիրան» միջազգային 11-րդ կինոփառատոնի շրջանակներում տեղի ունեցավ հերթական հանդիպում-միջոցառումը՝ «Թումո» ստեղծարար տեխնոլոգիաների կենտրոնում: «Թումոն» այս անգամ հյուրընկալեց ամերիկահայ դերասան Քեն (Գեղամ) Դավիտյանին, որն առավել հայտնի է «Բորատ» ֆիլմում Ազամատ Բագատովի դերով: Դերասանը կիսվեց փառատոնյան տպավորություններով, մասնագիտական հմտություններով, պատասխանեց հյուրերի հարցերին:
Քեն Դավիտյանը տպավորությունները դրական են. «Ես ուրախ եմ հյուրընկալվել Երևանում: Հիշում եմ, երբ իննսունականներին եկել էի այստեղ, Հայաստանը վատթար վիճակում էր գտնվում. հյուրանոցի լոգարանում «պատանդ էի մնացել», քանի որ ամբողջ հյուրանոցի ջուրն անջատել էին: Բայց հիմա տարբերությունն իսկապես ակնհայտ է: Շատ եմ լսում, որ մարդիկ բողոքում են Հայաստանի տնտեսական, սոցիալական վիճակից, բայց համեմատության կարգով ես տեսնում եմ, որ մեր երկիրը իննսունականներից հետո շատ է փոխվել:
Ես ուզում եմ Հայաստանը ավելի լավը տեսնել: Մենք հրաշալի երիտասարդներ ունենք, որոնք ցանկանում են ամեն հարցում օգնել մեզ, մասնակցել հետագա ծրագրերին: Մենք մեր նոր սերնդին ենք պարտական՝ երկրի ՝ ավելի լավը դառնալու համար: Եվ ես ցանկանում եմ ձեզ շնորհակալություն հայտնել»:
Aravot.am-ը հետաքրքրվեց, արդյո՞ք Քեն Դավիտյանը ցանկություն ունի հետագայում Հայաստանում ֆիլմ նկարել : Դերասանը որոշ փակագծեր բացեց. շուտով Քեն Դավիտյանը ռոմանտիկ կատակերգություն կնկարահանի, որի հիմքում իրական սիրո պատմություն կլինի: Ֆիլմը պատմելու է երկու ընտանիքների մասին, որոնք 1914 թվականին սիրո գորգ են նվիրում իրար՝ ի նշան սիրո ու ընտանիքների ընկերության, ու գորգն էլ հենց «գլխավոր դերում» կլինի:
Կարդացեք նաև
Հնարավոր է նաև հատուկ ծրագիր իրականացվի «Թումոյում». անձնակազմը ցանկություն ունի ֆիլմ նկարահանել ստեղծարար կենտրոնի սաների մասնակցությամբ և օգնությամբ:
Դերասանը նաև խոսեց «Բորատ» ֆիլմից. «Ես ուղղակի ճիշտ ժամանակին ճիշտ տեղում հայտնվեցի ու ստացա այդ դերը: Նկարահանվել եմ 650 ժամ, որից միայն մեկուկես ժամն է տեսնում հանդիսատեսը: Այս ֆիլմը փոխեց իմ կյանքը՝ ինձ «իսկական» դերասան դարձնելով, և հենց դրա համար էլ ֆիլմում մարմնավորած իմ կերպարին՝ Ազամատ Բագատովին ամենաշատն եմ սիրում: Հպարտ եմ նաև, որ ամբողջ ֆիլմի ընթացքում իմ գյուղացի, ծեր կերպարը հայերեն է խոսել»:
Քեն Դավիտյանը նաև մի քանի խորհուրդներ տվեց սկսնակ դերասաններին ու ռեժիսորներին. «Ֆիլմարտադրողների համար ամենակարևոր կետերն են հետևողականությունը և նախապես պատրաստություն տեսնելը: Շատ կարևոր է ֆիլմը նկարահանելուց առաջ ճշտել բոլոր մանրուքները: Պետք է հիշենք, որ մեր ամենամեծ հարստությունը մեր գլխում է գտնվում: Հայաստանը չունի նավթ, բայց ունի պայծառ ուղեղներ, որոնք էլ կարող են մեր երկիրը ոտքի կանգնեցնել: Մեզ մնում է միայն ճիշտ օգտագործել այդ հարստությունը»:
Սյունե ՍԵՎԱԴԱ
