Այսօր մեկնարկում է «Ոսկե ծիրան» միջազգային կինոփառատոնի շրջանակներում իրականացվող «Ռեժիսորներ առանց սահմանների» (ՌԱՍ) 8-րդ համատեղ արտադրության տարածաշրջանային ծրագիրը, որը կշարունակվի մինչև հուլիսի 17-ը:
«Այս ծրագիրն իմ ամենասիրելի ծրագրերից մեկն է, որովհետև այն շոշափելի օգուտ է տալիս ամեն մի կինոնախագծի»,- այսօր լրագրողների հետ հանդիպման ժամանակ ասաց «Ոսկե ծիրան» կինոփառատոնի հիմնադիր տնօրեն, կինոռեժիսոր Հարություն Խաչատրյանը:
Նա նաև իր ուրախությունն արտահայտեց բազմաթիվ կինոսերների մեկ հարկի տակ հավաքված տեսնելու առթիվ. «Մենք շատ երջանիկ ենք հյուրընկալել մեր բարեկամներին, մարդկանց, որոնք սիրում են կինոն, ստեղծում են այն և, ընդհանրապես, տարածում են կինոյի գաղափարը հասարակության մեջ»:
Հիշեցնենք, որ «Ռեժիսորներ առանց սահմանների» համատեղ արտադրության տարածաշրջանային ծրագիրն ամենամյա միջոցառում է, որը նպատակ ունի աջակցելու կինոգործիչներին, ինչպես նաև նպաստելու Արևելյան գործընկերության երկրներում ֆիլմերի արտադրությանն ու համատեղ արտադրությանը:
Կարդացեք նաև
«Ոսկե ծիրան» կինոփառատոնի գեղարվեստական ղեկավար Սուսաննա Հարությունյանի խոսքով՝ սա ֆիլմարտադրության համար կայացած մի հարթակ է, որը նպաստում է ոչ միայն հայկական, այլև ողջ տարածաշրջանի կինոյի զարգացմանը. «Ութ տարվա ընթացքում 100-ից ավելի կինոնախագծեր են ստեղծվել «Ռեժիսորներ առանց սահմանների» ծրագրի շրջանակներում, որոնցից լավագույնները դարձել են ֆիլմեր, բազմաթիվ փառատոների են մասնակցել ու հաջողություններ ունեցել: Եվ մենք շատ հպարտ ենք, որ դրանք ՌԱՍ-ից են սկիզբ առել, այստեղից է նրանց ճանապարհը բացվել»,- նշեց Ս. Հարությունյանը:
Ինչպես արդեն տեղեկացրել ենք, ՌԱՍ ծրագրին մասնակցության համար ներկայացված 24 նախագծերից այս տարի ընտրվել են 14-ը, որոնք կներկայացվեն և կմրցեն զարգացման երեք դրամաշնորհների համար:
Իսկ ՌԱՍ-ի մրցատյանում ընդգրկված են Սուսաննա Հարությունյանը, Թբիլիսիի կինոփառատոնի գեղարվեստական ղեկավար Նինո Անջափարիձեն, ռումինացի պրոդյուսեր Դան Բուրլաքը, պրոդյուսեր, ՌԱՍ նախագծի միջազգային խորհրդատու Ջեֆ Քալուսդյանը և ուրիշներ:
Հայաստանի ազգային կինոկենտրոնի տնօրեն Գևորգ Գևորգյանը նույնպես շատ է արժևորում «Ռեժիսորներ առանց սահմանների» ծրագիրը, որովհետև, ինչպես նշեց նա, սա բացառիկ հնարավորություն է կինոռեժիսորների համար շփվելու միմյանց հետ, մոտիկից ծանոթանալու նախագծերին և համատեղ ֆիլմարտադրություն կազմակերպելու:
«Ես այս ծրագիրը կարևորում եմ նաև այն պատճառով,- հավելեց պարոն Գևորգյանը,- որ տեսնում եմ՝ ինչպես է տարեցտարի նրա լսարանը մեծանում, ինչը նշանակում է, որ հետաքրքրությունն է մեծանում, հետևաբար՝ համատեղ աշխատանքներն էլ են շատանում:
Ես կարծում եմ, որ տարածաշրջանի համար նման միջոցառումները շատ կարևոր են, որովհետև առաջնային նշանակություն ունի ինտեգրվելը միջազգային կինոպրոցեսների, միջազգային այնպիսի կառույցների, որոնք հնարավորություն են ընձեռում կինոյի ասպարեզում որոշակի առաջընթաց ապրելու, համատեղ ֆիլմեր ստեղծելու, ծանոթանալու, իմանալու, թե այլ երկրներում (հատկապես եվրոպական երկրներում) ինչպիսի միջոցառումներ, ֆոնդեր, կառույցներ, պրոդյուսերական ընկերություններ կան, որոնց հետ շփումից կարող են համատեղ արտադրության ֆիլմեր ծնվել»:
Սիրանուշ ՀԱՅՐԱՊԵՏՅԱՆ
