«Խոշոր եղջերավոր բրուցելոզով վարակված կենդանիների միսը վաճառքի է ենթակա առանց սահմանափակման»,- այսօր՝ հուլիսի 15-ին, «Հայելի» մամլո ակումբում լրագրողների հետ հանդիպման ընթացքում հայտարարեց Սննդի անվտանգության պետական ծառայության «Հանրապետական անասնաբուժասանիտարական եւ բուսասանիտարական լաբորատոր ծառայությունների կենտրոն» ՊՈԱԿ-ի տնօրեն Արման Գեւորգյանը:
Նա նշեց, որ բրուցելոզով հիվանդ խոշոր եղջերավոր անասուններն ենթակա են սպանդի, որ չվարակվեն այլ կենդանիները, եւ որ այդ կենդանու այլ մթերքներով չվարակվի մարդը, օրինակ՝ հում կաթից, մածունից: Նա հայտարարեց, որ բրուցելոզի հարուցիչը շատ անկայուն է.
«Եռացնելուց նա վայրկյանական ոչնչանում է 80 աստիճանի պարագայում՝մինչ ջուրը դեռ չի եռում՝ ընդամենը հինգ վայրկյանի ընթացքում: Կան շատ ավելի վտանգավոր հիվանդություններ»:
Հարցին՝ երբ մարդը, կտրտելով բրուցելոզով վարակված կենդանու միսը, վնասում է նաեւ իրեն, հնարավո՞ր է, որ այդ դեպքում նա էլ վարակվի, Արման Գեւորգյանը պատասխանեց, որ շատ չնչին է այդ հավանականությունը:
Ամի ՉԻՉԱԿՅԱՆ
