Հայկական երեւակայությունն այն աստիճանի է հասել, որ «քարից հաց քամելու» կենսակերպից անցել են «հողից փող շինելուն»:
Հայաստանի բարձր լեռնային գոտիներում, որտեղ ամենաբարձր բերրիության հողեր են, անխնայորեն հանվում են ու վաճառվում, ինչը օրենքով թույլատրելի չէ: Այսօր Aravot.am-ի հետ զրույցում այս մասին ասաց աշխարհագրական գիտությունների դոկտոր, հողագետ Աշոտ Խոյեցյանը: Նրա վստահեցմամբ, այս բիզնեսով զբաղվում են ամենաբարձր պաշտոնյաները: Ըստ մասնագետի, բարձր լեռնային գոտիներոմ հողերի մասսայական վաճառք է կատարվում. «Սեւահողերը հանում` վաճառում են, մարդիկ ասում են` սա իմ սեփականաշնորհած տարածքն է, բայց հիմք չունեն հողը հանել վաճառել, ընդամենը իրավունք ունեն հողօգտագործման համար: Էքսկավատորները շարած, տոննաներով սեւահողերը հանում են: Գեղամա լեռներում, Ջավախքում, Արագածում, «կրազներով» հողերը տանում են: Հողը պետության հարստությունն է, իրավունք չունեն»:
Պարոն Խոյեցյանի խոսքերով` հողի ամեն մի բացված հատված` «կոշը» գցած ու մի քանի մետր խորանարդ մետր հանած մասը, դառնում է հողի բնականոն վերականգնման գործընթացի խաթարման պատճառ. «Միջին լեռնային գոտու հողերը բացարձակապես ավիրված են, հիմա անցել են բարձր լեռնայինին: Այս հատվածներում հողագործությամբ չեն զբաղվում, որովհետեւ 2400 մետրից բարձր ջերմությունն է պակաս, միայն անասնապահությամբ են զբաղվում: Այդ հողերի հումուսայնությունը 15-20% է, աշխարհի ամենաբերրի հողերն են:
1 մետր հանած հողը վերականգնվում է 1000-1500 տարվա ընթացքում: Այսինքն` հազարավոր տարիներ են պետք` մեկ վայրկյանում մայրական ապարների վերականգնման համար»:
Նելլի ԲԱԲԱՅԱՆ
