Պաշտպանը դիմելու է վերաքննիչ դատարան
Աշոտ Առուշանյանի դեմ հարուցված քրեական գործը երկրորդ անգամ կհայտնվի ՀՀ քրեական վերաքննիչ դատարանում:
Նախորդ անգամ Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Արշակ Վարդանյանի դատավճռով նա դատապարտվել էր ազատազրկման այն բանի համար, որ տեղեկություններ էր հաղորդել գործով երկրորդ ամբաստանյալին՝ Էդգար Կարաքեշիշյանին, «Մանանա Գրեյն» ընկերության փոխտնօրեն Արմեն Մանուկյանի կողմից տեղափոխվող գումարի մասին: Գումարը եղել է 56 միլիոն դրամ:
Դատավճիռը բողոքարկվել էր, այն ուղարկվել էր նույն դատարան, այլ կազմով քննելու համար:
Կարդացեք նաև
Երկրորդ դատավորը՝ Մեսրոպ Մակյանը կայացրել էր դատավճիռ, որտեղ գրել է, որ Աշոտ Առուշանյանի մեղքը տեսնելու անհնարինությունը փաստելով, պետք է դիտարկենք ոչ թե ապացույցները, այլ վերաբերելի վարկածները: Ըստ պաշտպան Լիպարիտ Սիմոնյանի, դատավճիռը կայացվել է վարկածի հիման վրա:
Ի դեպ, նա ուսումնասիրել էր հայոց բառարանները, համաձայն որի վարկած նշանակում է կարծիք կամ ենթադրություն:
ՀՀ փաստաբանների պալատում հրավիրված մամուլի ասուլիսի ժամանակ Աշոտ Առուշանյանի պաշտպան Լիպարիտ Սիմոնյանն ասաց, որ բողոքը վաղը կմուտքագրի վերաքննիչ դատարան:
Նա ներկայացրեց նորից այն հանգամանքները, որոնց մասին պարբերաբար ներկայացրել ենք, լուսաբանելով դատական ողջ գործընթացը: Մասնավորապես, որ Աշոտ Առուշանյանին ոստիկանության Էրեբունու բաժին են տարել 15-20 ոստիկաններով հարձակվելով փողոցում: Նրա դեմ ցուցմունք է տվել մի անգամ գողության մեջ կասկածվող Արտաշես Գալուստյանը, որին դրանից հետո ազատել են, իսկ օրեր հետո ինքնասպան եղած հոր՝ Պետրոս Գալուստյանի հետ հայտնաբերել են կախված վիճակում:
Լիպարիտ Սիմոնյանը նշեց նաեւ ՀԱԿ ակտիվիստ Տիգրան Առաքելյանի ցուցմունքը, որն ասել էր իր խցում գտնվող Արտաշես Գալուստյանի նկատմամբ իրականացված խոշտանգումների եւ սպառնալիքների մասին, սպառնալիքները վերաբերել են 3-րդ անձի դեմ ցուցմունք տալուն: Սակայն այս մասով միջնորդություն չէր ներկայացրել դատարանը, եւ քրեական գործ չէր հարուցվել:
Հիշեցնենք, որ զարհուրելի խոշտանգումների մասին պնդել էր նաեւ Էդգար Կարաքեշիշյանը. «Այն ինչ արել են Արտաշեսի հետ, իմ նկատմամբ էլ է եղել»:
Էդգարի հետ կապն այնքանով էր, որ նա բռնցքամարտ է պարապել Աշոտ Առուշանյանի հետ:
Aravot.am-ի հարցին, թե Էդգար Կարաքեշիշյանի պաշտպանը ՝ Ռաֆիկ Սաֆարյանը նույնպե՞ս բողոք է բերելու, Լիպարիտ Սիմոնյանը պատասխանեց այո: Էդգար Կարաքեշիշյանը դատապարտվել էր 7,5 տարվա ազատազրկման:
Ռուզան ՄԻՆԱՍՅԱՆ
