«Պատերազմը վաղուց է սկսվել»,- այսօր` հուլիսի 14-ին, «Ֆորում» մամլո ակումբում լրագրողների հետ հանդիպման ընթացքում հայտարարեց «Արաբո» ջոկատի հրամանատար Մանվել Եղիազարյանը:
Նա համարում է, որ Իլհամ Ալիեւի համար հեշտ չէ պատերազմ վերսկսելը, քանի որ Ալիեւը Ադրբեջանի ընտրված նախագահը չէ, եւ քանի որ նա մեծ գումարներ է իր ժողովրդից թալանել: Մանվել Եղիազարյանի կարծիքով` Ալիեւը գիտակցում է, որ եթե պատերազմը սկսվեց, եւ Ադրբեջանը չկարողացավ հաղթել, ապա նա կորցնելու է իր աթոռը, փողերը եւ իշխանությունը.
«Եվ հիմա նա էլ է վախվորած, որպեսզի հանկարծ պատերազմում տանուլ չտա եւ ամբողջը չկորցնի: Այդ պատճառով էլ Ալիեւը հարցը ձգձգում է, եւ քանի որ ժամանակն ի նպաստ Ադրբեջանի է աշխատում, չի բացառվում պատերազմի վերսկսումը, քանի որ վաղը կարող է բավականին ուրիշ վիճակ հասունանալ, եւ Ալիեւը պատերազմը սկսելու հնարավորություն չունենա»:
Պարոն Եղիազարյանի խոսքերով` պատերազմը չի կարող երկար տեւել, քանի որ նա կարող է պայթունավտանգ իրավիճակ ստեղծել առանց այդ էլ անհանգիստ Կովկասում, եւ հնարավոր չէ մի ամբողջ պատերազմ պայթել այդ տարածաշրջանի պատճառով: Հրամանատարի կանխատեսմամբ այդ պատերազմը կարող է տեւել ոչ ավելի, քան մեկ ամիսը.
«Կովկասում այս իրողության մեջ մենք չենք կարող առանց զենքի մեր անունը պահենք, մեր հայրենիքը պահենք, մեր անվտանգությունն ապահովենք: Այդ պատճառով էլ ես կարծում եմ, որ պատերազմը խելագարների զբաղմունք է, բայց առանց պատերազմի հնարավոր չէ. Ինչքան էլ զինվորը չուզենա պատերազմ, միեւնույն է զինվորին ծափահարում են»:
Կարդացեք նաև
Ամի ՉԻՉԱԿՅԱՆ
