Այն փարաջանովյան շունչ ուներ
11-րդ «Ոսկե ծիրան» կինոփառատոնը, որ մեկնարկել էր սուրբ Գրիգոր Լուսավորիչ եկեղեցում կայացած ավանդական ծիրանօրհնեքով, Յուրի Հարմաշի՝ փարաջանովյան լուսանկարների ցուցահանդեսով, «Կար չկար մի Փարաջանով» գրքի շնորհանդեսով, իր տրամաբանական շարունակությունն ունեցավ Փարաջանովի «Նռան գույնը» ֆիլմի ցուցադրությամբ: Վերջինս Սկորսեզեի հիմնադրամի կողմից վերականգնված տարբերակն էր:
«Ոսկե ծիրանն» այս տարի փարաջանովյան շունչ ունի: «Նռան գույնի» նկարիչ Ստեփան Անդրանիկյանին ու կոմպոզիտոր Տիգրան Մանսուրյանին հանձնվեցին փարաջանովյան մրցանակներ: Ստեփանն Անդրանիկյանը նշեց, որ մրցանակը Փարաջանովինն է եւ ինքը այն նվիրում է նրա սուրբ հիշատակին: Ինչպես ցանկացած փառատոնի, երեւանյան «Ոսկե ծիրանին» էլ կարմիր գորգի առկայությունը յուրատեսակ հանդիսավորություն հաղորդեց: Անցնում են գորգի վրայով աշխարհահռչակ կինոգործիչներն ու հարգարժան հյուրերը, ու Երեւանը հերթական անգամ արձանագրում է՝ կինոն իսկապես կարող է տոնական մթնոլորտ ստեղծել ու նոր գույն հաղորդել մայրաքաղաքին:
Փառատոնի օրերին կցուցադրվի 300 Ֆիլմ աշխարհի 49 երկրից: «Ոսկե ծիրանի» առիթով այս տարի էլ մի շարք անվանի կինոգործիչների կհանդիպենք, այդ թվում՝ Կիմ Կի Դուկին, Ցզյա Չժակեին, Ամոս Գիտային, Քշիշտոֆ Զանուսիին, Մարկո Մյուլերին:
Փառատոնը լուսաբանում են «դրսի» 20 լրատվամիջոց, այդ թվում ռուսական «Կուլտուրան», ֆրանսիական Positif-ը, Նորվեգիայի հեռարձակողների միությունը, գերմանական German weekly paper-ը: Ավելի ուշ Ազգային օպերային թատրոնում կայացավ «Ոսկե ծիրան» կինոփառատոնի բացման բուն արարողությունը: «Ոսկե ծիրանի» հիմնադիր նախագահ Հարություն Խաչատրյանը նշեց, որ եթե չլինեին բարեկամները, ոչ ծիրան կլիներ, ոչ էլ «Ոսկե ծիրան»:
Կարդացեք նաև
ՀՀ վարչապետ Հովիկ Աբրահամյանը ընդգծեց, որ «Ոսկե ծիրանի» հեղինակությունը տարեցտարի մեծանում է: ՀՀ ժողովրդական արտիստ Հասմիկ Պապյանն առաջին անգամ երգեց ծիրանափողի՝ հայկական դուդուկի նվագակցությամբ: Ինչպես նախորդ տարիներին, այս տարի էլ «Ոսկե ծիրանի» գլխավոր հովանավորը «ՎիվաՍել-ՄՏՍ» ընկերությունն է:
Գոհար ՀԱԿՈԲՅԱՆ
Իսկապես ,,ոսկե,,ծիրան՝կգ-ն 1000դրամով:
Միևնույնն է ՇՆՈՐՀԱՎՈՐՈՒՄ ԵՄ՜