Ոստիկանության 35 տարվա աշխատակից Նաիրի Ասրյանը ճանապարհային երթեւեկության կանոնների խախտումների համար մեկ տարում 1 միլիոն 500.000 դրամ պարտք է կուտակել: ԴԱՀԿ-ն սառեցրել է նրա բանկային հաշիվները, հիմա նախկին ոստիկանը ոչ կարողանում է տուգանքները վճարել, ոչ էլ բանկային այլ վճարումներ կատարել:
Aravot.am-ի հետ զրույցում Նաիրի Ասրյանը պատմեց, որ միլիոնի հասնող տուգանքների ակտերն այս գարնանից են սկսել իր տան հասցեին ուղարկվել, մինչ այդ նա բնակության այլ հասցե է ունեցել. «Փոխանակ ողջամիտ ժամկետում ուղարկեն, զգուշացնեն, ասեն ունես այսքան պարտք, ոչ թե 400.000 դրամի ակտերը միանգամից ուղարկեն: 35 տարի ոստիկանությունում ծառայել եմ, ոստիկանության վետերան եմ, պահում եմ ոստիկանության վետերան հորս, բայց ինչ է ստացվում` պետական աշխատողներին ցայտնոտի մեջ են գցում: Հիմա չգիտենք` որտեղից փող վերցնենք, որ էդքան պարտքը փակենք»:
Պարոն Ասրյանը չի կարողանում հասկանալ, թե ինչպես են առանց դատարան հրավիրելու ԴԱՀԿ-ն սկսել հարկադրանք կիրառել իր ունեցածի նկատմամբ. «Եթե չեմ կարողանում իմ հաշվեհամարից գումար հանել, որտեղից վճարեմ, իմ գրպանում օրական որտեղից 100.000 դրամ, որ տվյալ պահին մի քանի ակտի համար վճարեմ: Իսկ ԴԱՀԿ-ն էլ ամեն մի գործողության համար 5000 դրամ է վերցնում»:
Նա նաեւ ասաց, որ պատրաստվում է ակտերը հետը դատարան տանել` բողոքարկելու: Նախկին ոստիկանի տուգանքների ակտերից մեկն էլ հաստատում է, որ երթեւեկության կանոններ է խախտել Ադրբեջանի սահմանին. «Գրված է` Սեւան-Իջեւան ու վերջում Ադրբեջանի սահման, սա ընդհանրապես չեմ հասկանում: Էս ինչ խաղ է, ինչպես են տուգանում Ադրբեջանի սահմանին»:
Կարդացեք նաև
Արփինե ՍԻՄՈՆՅԱՆ
