«Սահմանադրությունների միջին տարիքը տասներկու տարի է: Եվ, ըստ էության, մեր Սահմանադրությունը կարող է փոխվել»,- Երևանում մեկնարկած «Սահմանադրական բարեփոխումները ժողովրդավարական զարգացման համատեքստում» խորագրով միջազգային գիտաժողովի ժամանակ հայտարարեց քաղաքական գիտությունների դոկտոր Ալեքսանդր Մարկարովը:
Նա քննարկմանը ներկայացրեց Հայաստանյան Սահմանադրության պատմությունը եւ այն զարգացումները տարբեր շրջաններում, որոնք տարբեր ինստիտուտներում կատարված փոփոխությունների արդյունքում են եղել:
Նույն խնդիրները, որ դրված են եղել 90-ականների Սահմանադրության հիմքում, այսօր էլ քննարկվում է: Սահմանադրական հանձնաժողովի սկզբնավորման օրվանից քննարկվում է Հայաստանի կառավարման ձեւը: «Այսօր արդեն կարող ենք քննարկել, թե այս կամ այն կառավարման ձեւը որքան արդյունավետ կլինի»,- ասաց նա: Խորհրդարանական կառավարման մոդելի կողմնակիցների հիմնական փաստարկը, ըստ բանախոսի, այն է, թե խորհրդարանական կառավարման համակարգն ավելի է ազդում ժողովրդավարական համակարգի ներդրմանը:
Ուժեղ նախագահության կողմնակիցները վախենում են, որ պառլամենտարիզմի կարող է չաշխատել: Պարոն Մարկարովը նկատեց, լավ է Սահմանադրությունը քննարկվում է պետական համատեքստում, անհրաժեշտ է դիսկուրսն անցկացնել հասկանալու համար՝ ինչ է պետք:
Կարդացեք նաև
Մարդկային զարգացման միջազգային կենտրոնի Կրթության և վերապատրաստման ստորաբաժանման ղեկավար Աշոտ Խուրշուդյանն էլ նշեց, որ սահմանադրական բարեփոխումների ճանապարհը դժվար է, եւ իրավական նորմեր հաստատելով չէ, որ մենք կտեսնենք ժողովրդավարություն, անհրաժեշտ են արժեքների, քաղաքական մշակույթի փոփոխություն: «Պետք է կոնֆլիկտ լինի, որ բերի զարգացման»,- ասաց պարոն Խուրշուդյանը եւ նշեց, որ այդ կոնֆլիկտները պետք է լինեն կոնստրուկտիվ, ոչ թե ազգային անվտանգությանը սպառնացող: Ըստ նրա՝ պետք է կոնֆլիկտներ ձեւավորվեն կառավարման բոլոր օղակների միջեւ, որ ժողովրդավարությունը ձեւավորվի, ինչին էլ միտված են սահմանադրական բարեփոխումները:
Բանախոսը նկատում է, որ մեզանում դրանք չկան, չկան, որովհետեւ իշխանություն ունեցողներն անկախ չեն: «Կառավարության միջեւ էլ պետք է հակակշիռ լինի նախարարությունների միջեւ: Մենք տեսնում ենք, որ այդ կոնֆլիկտները լուծվում են այլ կերպ. ես քո բոստանը չեմ մտնի, դու իմը չես մտնի: Այդպես դու քեզ զրկում ես իշխանությունից: Եթե հրաժարվում է, ապա համակարգը սկսում է չաշխատել: Պիտի անկախ լինենք, որ հակակշռենք»,- ասաց նա:
Հռիփսիմե ՀՈՎՀԱՆՆԻՍՅԱՆ
