ՀՀ կառավարության շենքի դիմաց հավաքվել էին ոչ միայն «Նաիրիտ» գործարանի աշխատակիցները, այլեւ այլ քաղաքացիներ, ովքեր մոտեցան եւ իրենց բողոքները ներկայացրեցին վարչապետ Հովիկ Աբրահամյանին:
Ինչպես արդեն նշել էինք, վարչապետը խոստացավ կառավարության նիստից հետո լսել «Նաիրիտ» գործարանի աշխատակիցների բողոքները եւ փորձել նրանց լուծում տալ: Երբ լրագրողները մոտեցան վարչապետին, «Նաիրիտ» գործարանի արհմիության նախագահ Հրաչյա Թադեւոսյանը վրդովվեց.
«Մի րոպե, թողե’ք թող ժողովրդի հարցը լուծի, լրագրողներդ ձեր հարցն եք լուծում: Ես խնդրում եմ, թողե’ք «Նաիրիտի» հարցը սկզբից»:
Լրագրողներից մեկն էլ նշեց, որ իրենք էլ են գործարանի հարցը բարձրացնում, սակայն պարոն Թադեւոսյանը պնդեց, որ լրագրողները խանգարում են.
«Ժողովուրդը եկել է, վարչապետն ուզում է կոլեկտիվին մի երկու բառ ասի, դուք վրա եք տվել: Դուք վարչապետին ամեն օր տեսնում եք, խնդրում եմ, թողե’ք թող վարչապետը կոլեկտիվին երկու բառ ասի»:
Կարդացեք նաև
Մանրամասները` տեսանյութում
Մինչ կառավարության նիստը կավարտվեր, «Նաիրիտի» աշխատակիցները կազմեցին ցուցակը, թե ովքեր են վարչապետի հետ քննարկելու իրենց հուզող հարցերը: Մեխանիկական արտադրամասի արհմիության նախագահ Հակոբյան Թոմիկը նույնպես այդ ցանկում էր, վերջինս Aravot.am-ի հետ զրույցում նշեց, որ «Ռոսնեֆտ» ընկերությունը բանակցություններ է տանում իրենց գործարանի վերաբերյալ եւ խոստացել են սեպտեմբեր-հոկտեմբեր ամիսներին վերջնական լուծում տալ իրենց հարցին.
«Հիմա մենք ավելի կոնկրետ ուզում ենք վարչապետից իմանալ, թե դա ե՞րբ կլինի»
Ամի ՉԻՉԱԿՅԱՆ
