Սոցիոլոգ Ահարոն Ադիբեկյանն այսօր «Տեսակետ» մամուլի ակումբում ներկայացրեց մարզերի բնակչության բարեկեցության վարկանիշի վերաբերյալ անցկացրած վերջին հարցման արդյունքները:
Հարցումներին մասնակցել են Հայաստանի 5000 բնակիչներ, իսկ հարցման պատվիրատուներն են Հայաստանի հանրապետական կուսակցությունը, մարզպետները եւ քաղաքապետները:
Ահարոն Ադիբեկյանը լրագրողներին ներկայացրեց, որ մարզերում եւ Երեւանում բնակչության բարեկեցության մակարդակի չափման համար 7 չափանիշներ են ընտրվել՝ տարածքների բարեկարգումը, համայնքների վիճակի փոփոխությունը, երկրից արտագաղթելու ցանկությունը, դժգոհությունների արտահայտման հաճախականությունը, ինքնուրույնությունը, գործազրկությունը եւ եկամուտները:
Պրն Ադիբեկյանի փոխանցմամբ` վերջին 7 տարիների ընթացքում` համաշխարհային ճգնաժամից հետո, Հայաստանում բնակչության բարեկեցության մակարդակը կտրուկ իջել է:
Կարդացեք նաև
Վերը նշված չափանիշների համաձայն` Հայաստանի մարզերից բնակչության բարեկեցության մակարդակով ամենաբարձրը Գեղարքունիքի մարզն է, հետո Սյունիքի մարզը, իսկ հետո էլ Արմավիրի մարզը: Իսկ բարեկեցության ամենացածր մակարդակը ունի Լոռու մարզը:
Պրն Ադիբեկյանը Գեղարքունիքի մարզի բնակչության բարեկեցության բարձր մակարդակը պայմանավորում է նրանով, որ այդ մարզում շատ են զբաղվում ձկնորսությամբ, մսաբուծությամբ. «Այս մարզում հնուց ձեւավորվել է արտագաղթելու ավանդույթը, այս մարզից են հիմնականում խոպան մեկնում»:
Սոցիոլոգը նաեւ առանձնացրեց մի փաստ, որ Հայաստանից հիմնականում արտագաղթում են ավելի բարձր խավի ներկայացուցիչները. «Արտագաղթում են ոչ թե աղքատները, այլ միջին եւ ավելի բարձր խավի ներկայացուցիչները, նրանք, ովքեր գումար ունեն, ովքեր կարող են իրենց թույլ տալ տոմս գնել»:
Երեւանում անցկացված հարցումների արդյունքում էլ պարզ է դարձել, որ բնակչության բարեկեցության ամենաբարձր մակարդակն ունեն Ավան-Առինջ, Արաբկիր, Մալաթիա եւ Կենտրոն համայնքները, իսկ ամենացածրը՝ Շենգավիթը եւ էրեբունին:
Էլյա ՀՈՎՀԱՆՆԻՍՅԱՆ
