Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Գագիկ Պողոսյանը մտել է խորհրդակցական սենյակ՝ անմեղսունակ Վլադիմիր Սիաբանդովի գործով որոշում կայացնելու:
Մինչ այդ հրապարակվեցին տուժող, հանգուցյալ Քյարամ Ավդոյանի 2 ցուցմունքները: Նա հայտնել էր, որ իր բաջանաղի տղա Վլադիմիր Սիաբանդովը իրեն կանչել է «Ռիչ» սրճարան: Նա նոր էր վերադարձել Գերմանիայից, ուր եւ գտնվում էին իր կինն ու 4 երեխաները: Ըստ հանգուցյալի, իր եւ ամբաստանյալի խոսակցությունը իրեն դուր չի եկել, իսկ երբ նա դուրս է եկել բարից, այդ ժամանակ Սիաբանդովը դանակով հարձակվել է իր վրա, թիկունքից եւ դիմացից 13 հարված հասցրել, մտադրված լինելով սպանել նրան:
Տուժողի քույրը հանդես եկավ միջնորդությամբ. նա խնդրում էր դատարան կանչել Սիաբանդովի զոքանչին եւ աներոջը, ինչպես նաեւ ոստիկաններին, որոնք բերման են ենթարկել նրան, որոնք պետք է հաստատեին, որ Սիաբանդովը անմեղսունակ չի: Սակայն մեղադրողն ասաց, որ միայն մասնագետները կարող են ասել նրա անմեղսունակության մասին եւ մերժեց միջնորդությունը:
Դատախազը միջնորդեց նրան՝ բժշկական հարկադիր բուժում հատուկ պայմաններում: Դատարանը մտել է խորհրդակցական սենյակ:
Կարդացեք նաև
Հանգուցյալի հարազատները ասում են, որ կդիմեն բոլոր ատյաններին, այդ թվում՝ վերաքննիչ, վճռաբեկ, Մարդու իրավունքների եվրոպական դատարան:
Նշենք, որ մինչ դատական նիստը Գագիկ Պողոսյանը թույլ չտվեց Քյարամ Ավդոյանի մորը մասնակցել դատական նիստին: Դատարանի շենքի դիմաց, աթոռին նստած, Քյարամ Ավդոյանի մայրը սպասում է դատարանի որոշմանը:
Դատարանը հարկադիր բուժման ուղարկեց Վլադիմիր Սիաբանդովին: Որոշման հրապարակումից հետո Քյարամ Ավդոյանի մայրը վատացավ:
Ռուզան ՄԻՆԱՍՅԱՆ
