«Առավոտի» հետ զրույցում Ասիական զարգացման բանկի գործունեության նկատմամբ վերահսկողություն իրականացնող հ/կ-ների միջազգային ֆորումի հայաստանյան ներկայացուցիչ, Էկոլոգիական հասարակական դաշինքի համակարգող Սիլվա Ադամյանը նշել էր, որ «Հյուսիս-հարավ» ավտոմայրուղու Քաջարան-Ագարակ հատվածի շինարարության համար Հայաստանը դիմել է եւ արդեն 150 միլիոն դոլար վարկ է ստացել Եվրասիական զարգացման բանկից:
Այս առնչությամբ «Առավոտը» ՀՀ ֆինանսների նախարարությունից հետաքրքրվեց, թե արդյոք հայտ ներկայացրե՞լ ենք Եվրասիական զարգացման բանկ, ստացե՞լ ենք նշյալ գումարը, եւ եթե այո, ապա ճանապարհահատվածի քանի՞ կիլոմետրն է նախատեսվում վերանորոգել այդ վարկային միջոցներով: Հարցրել էինք նաեւ, թե ե՞րբ է նախատեսվում «Հյուսիս-հարավ» ավտոմայրուղու Քաջարան-Ագարակ հատվածի շինարարության մեկնարկը: Մեր հարցերին ի պատասխան՝ ֆիննախի լրատվական ծառայությունից պատասխանել են. «Հյուսիս-հարավ» ավտոճանապարհային միջանցքի կառուցման համար ֆինանսավորում ներգրավելու նպատակով ՀՀ ֆինանսների նախարարությունը համագործակցում է Եվրասիական տնտեսական ընկերակցության հակաճգնաժամային հիմնադրամի հետ: Մոտակա ժամանակներս ակնկալվում է հարցը քննարկել Հիմնադրամի խորհրդի նիստի շրջանակներում, եւ կոնկրետ գումարներին, ֆինանսավորման պայմաններին, շինարարական աշխատանքների մեկնարկին եւ այլ մանրամասներին հնարավոր կլինի անդրադառնալ բանակցությունների հաջող ավարտից հետո»:
ԼՈՒՍԻՆԵ ԲՈՒԴԱՂՅԱՆ
«Առավոտ» օրաթերթ
08.07.2014
