Այսօր` հուլիսի 8-ին, «Հայելի» մամլո ակումբում լրագրողների հետ հանդիպման ընթացքում բնապահպան Կարինե Դանիելյանը նշեց, որ Հայաստանը բացարձակապես ուշադրություն չի դարձնում տեղեկատվական պատերազմին: Նրա խոսքերով`չնայած` արեւմտյան բոլոր հեռուստաընկերությունները քարոզչություն են անում, սակայն Հայաստանում հակառակ մոտեցումն է.
«Մեզանում, կարծես թե բոլորն ամեն ինչ գիտեն: Ենթադրենք` Ալիեւը վեր է կենում, ասում է, որ Երեւանը պատմական Ադրբեջանի տարածք է, բայց մենք չենք պատասխանում, որովհետեւ բոլորն ամեն ինչ գիտեն: Բայց ոչ ոք ոչինչ չգիտի: Իրենք իրենց բարբարոսաբար են պահում, ոչ մեկին դուր չի գալիս այդ կռիվը, իսկ մենք շատ ակադեմիական ոճով, իմաստուն լռում ենք` սխալ է»:
Տիկին Դանիելյանը նշեց, որ երեք նամակ են ուղարկել ՄԱԿ` ՄԱԿ-ի Զարգացման ծրագրի Եվրոպական տարածաշրջանային գրասենյակի Բրատիսլավայից Թուրքիա նախատեսված տեղափոխության կապակցությամբ: Նա տեղեկացրեց, որ որոշվել է, որ չնայած դժվարություններին` Հայաստանն աշխատելու է անմիջապես Նյու Յորքի հետ.
«Այն բարձրորակ փորձագետները, որոնց հետ մենք աշխատում էինք Բրատիսլավայում, իրենք չեն ուզել գնալ Ստամբուլ եւ դուրս են եկել աշխատանքից, իսկ Թուրքիան էլ ասել է` խնդիր չէ. Ես իմ մասնագետներին կփոխհատուցեմ»:
Սակայն տիկին Դանիելյանը մտավախություն ունի, որ մյուս գրասենյակները եւս կարող են տեղափոխվել Ստամբուլ, այդ դեպքում` նրա կարծիքով՝ Հայաստանն ամբողջապես կմեկուսացվի ՄԱԿ-ի գործունեությունից: Բնապահպանը նշեց, որ գրասենյակները տեղափոխվում են այն երկրներ, որոնք այդ տարածաշրջանում կոնֆլիկտային չեն.
«Հիմա Թուրքիան դառնում է ՄԱԿ-ի համար կենտրոն, մենք գնալու ենք Ստամբուլ` ապացուցենք, որ այո’ Եղեռն է եղել, մենք որեւէ հարց չենք կարողանալու լուծել. Ակնհայտ է` նրանք այնտեղ օգտագործելու են իրենց հսկայական ազդեցությունը»:
Ամի ՉԻՉԱԿՅԱՆ
