ՀՀ պետական խորհրդանշանների հանրահռչակման ծրագրերով զբաղվող «Մենք» ազգային արժեքների պահպանման հիմնադրամն այս տարի ևս կկազմակերպի պետական խորհրդանշանների օրվան նվիրված տոնական ավանդական քայլերթը, որը կմեկնարկի վաղը՝ հուլիսի 5-ին՝ ժամը 19:00-ին՝ Ազատության հրապարակից:
Այս մասին այսօր լրագրողների հետ հանդիպման ժամանակ ասաց «Մենք» ազգային արժեքների պահպանման հիմնադրամի հիմնադիր և գլխավոր տնօրեն Պավել Սարգսյանը:
Քայլերթը, որն արդեն չորրորդ տարին է կազմակերպվում, Պ. Սարգսյանի խոսքով՝ նպատակ ունի հասարակությանն համախմբելու պետական խորհրդանշանների շուրջ, ինչպես նաև վերաիմաստավորելու դրանց նկատմամբ վերաբերմունքը. «Մեզանում դեռևս այնքան էլ ձևավորված չէ ազգային, պետական խորհրդանշանների նկատմամբ ճիշտ վերաբերմունք, համապատասխան հարգանք,- ասում է Պ. Սարգսյանը:- Ունենք պետական դրոշ, որի գույների նշանակություններն անգամ մինչև վերջերս հստակեցված չէին: Սակայն մեր հիմնադրամի ներսում ստեղծված մասնագիտացված աշխատանքային խմբի շնորհիվ վերջերս թե´ դրոշի գույները հստակեցվեցին, թե´ զինանշանի պատկերային 30-ից ավելի սխալներ շտկվեցին: Մինչև 2011-2012 թթ. մենք ունեցել ենք սխալ զինանշանով անձնագրեր, այսինքն՝ օրենքին կից հավելվածին չհամապատասխանող զինանշան: Վերջերս ոստիկանության համապատասխան բաժնի հետ աշխատանքներ իրականացնելուց հետո նոր անձնագրերում արդեն ճիշտ զինանշանն է»:
Ինչ վերաբերում է մեր օրհներգին, Պ. Սարգսյանը նկատել է, որ երիտասարդների մեծամասնությունն անգիր գիտի այն, բայց 35-40 տարեկանից բարձր մարդկանցից շատ քչերը գիտեն օրհներգի բառերը. «Կարծես իրենցը չլինի,- ասում է բանախոսը,- հաճախ նույնիսկ բողոքում են, թե դրոշի գույները շատ վատ են ընտրված, անճաշակ են և այլն: Այդ մարդիկ չեն պատկերացնում, որ դրոշը դիզայն չէ, որ գեղեցիկ լինի, դրոշը գաղափարախոսություն է»:
Կարդացեք նաև
Վերադառնալով քայլերթին՝ Պ. Սարգսյանն ասաց, որ տարեցտարի աճում է հետաքրքրությունը դրա նկատմամբ, և մասնակիցների թիվը գնալով մեծանում է, սակայն հիմնադրամի միջոցները սուղ են, մանավանդ որ այս տարի պետությունը ֆինանսապես չի աջակցել քայլերթի կազմակերպմանը. «Եթե նախորդ տարիներին պետությունը 30-50%-ով աջակցում էր, ապա այս տարի պետական որևէ կառույց ֆինանսապես, այսինքն՝ դրոշների, շապիկների ձեռքբերման հարցում չաջակցեց մեզ, և այս տարի հիմնադրամը միայն դրոշներ կարողացավ ձեռք բերել, այն էլ՝ մոսկվայաբնակ հայ գործարարներից մեկի՝ Արկադի Թորոսյանի օգնությամբ»,- ասաց Պ. Սարգսյանը:
Սիրանուշ ՀԱՅՐԱՊԵՏՅԱՆ
