«Երբ դիմացիններն ասում են, որ Հայաստանը բանակցում է Մաքսային միությանն անդամակցելու համար, հիմա ասում են Եվրասիական տնտեսական միության համար, սա Հայաստանից կախված չէ: Դիմացինները խաղի կեսին գոլի տեղը փոխեցին և այդտեղ մեր իշխանությանը մեղադրելու տեղ չկա: Այլ բան կլիներ, եթե ասեին, թե ստորագրում են, բարեբախտաբար այդ իրավիճակը չկա»,-Aravot.am-ի հարցին`ի՞նչն է պատճառը, որ Հայաստանի` Եվրասիական տնտեսական միությանն անդամակցելը ձգձգվում է, ավելին, ՀՀ վարչապետը հայտարարում է, թե տեղյակ չէ, թե ինչու նախագահների հանդիպում տեղի չի ունեցել, այսպես արձագանքեց ՀՅԴ Բյուրոյի Հայ Դատի եւ քաղաքական հարցերի գրասենյակի պատասխանատու Կիրո Մանոյանը:
Հիշեցնենք, որ երեկ ՀՀ վարչապետ Հովիկ Աբրահամյանը հայտարարել էր, թե Եվրասիական տնտեսական միություն մուտք գործելու հարցում Հայաստանն իր պայմանավորվածությունները ամբողջովին կատարել է և ինքը տեղյակ չէ թե ինչու նախագահների հանդիպումը տեղի չի ունեցել:
Կիրո Մանոյանի կարծիքով` այս հարցում «գաղտնիքներ» չկան: Նա մանրամասնեց. «Ռուսաստանը ցանկանում է , որ Հայաստանը միանա Եվրասիական տնտեսական միությանը, մյուս երկուսը, Ադրբեջանի խաթրին նայելով, ձգձգում են: Հիշեք Պուտինի ասածները, թե ակնկալում է, որ Հայաստանը կմիանա և այլն: Պարզ երևում է, որ մյուս երկուսը, որ իրենք էլ հարցեր ունեն միության կազմավորման հարցում, շատ խանդավառված չեն հատկապես Ադրբեջանի պատճառով, որ ՀՀ-ն միանա: Մենք պիտի ճիշտը վարվենք այն իմաստով, որ զոռով չես կարող մտնել մի տեղ, որտեղ չեն ուզում մեզ, բայց իրենք էլ չեն ասել, որ չեն ուզում: Պարզապես փորձում են ինչ-որ բան կորզել Ադրբեջանից և Ռուսաստանից, որ Հայաստանին հանգիստ ասեն` այո: Եթե իսկապես չուզեին , հստակ կասեին, որ չեն ուզում»:
Պարոն Մանոյանի կարծիքով`անդամակցության մանրամասները հստակ չեն նաև իշխանության համար: Նա նշեց. «Եթե մեր իշխանություններն ուզում են, որ Եվրասիական տնտեսական միության անդամակցությունը վայելի նաև հասարակության կարևոր մասի աջակցությունը, ապա պետք է որ իրենք հստակ մասնակցություն ունենան: Բայց փաստ է այն, որ որոշ բաներ իրենց համար էլ հստակ չեն»:
Կարդացեք նաև
Մանրամասները ` տեսանյութում
Տաթև ՀԱՐՈՒԹՅՈՒՆՅԱՆ
