Կենդանիների մասին օրենքը ծաղրելու փոխարեն, պետք է այդ կարգերը դարձնել ազգային բրենդ, քանի որ Հայաստանում տարիներ շարունակ հոգատար ու լավ վերաբերմունք է ցուցաբերվել կենդանիների նկատմամբ: Այսօր գյուղնախարարությունում ասաց գյուղատնտեսության փոխնախարար Գառնիկ Պետրոսյանը` վստահեցնելով, որ կենդանիների նկատմամբ խնամքի, լավ վերաբերմունքի մասին դեռեւս Մովսես Խորենացին է գրել եւ մեր այլ պատմիչները: Ըստ փոխնախարարի, տեսակետ կա, որ եթե կովի համար դասական երաժշտություն միացնես` կաթնատվությունը կավելանա:
Պարոն Պետրոսյանի մեկնաբանություններն առավել մանրամասն` տեսանյութում
Ինչ վերաբերում է, թե այդ օրենքում մեխանիզմները նշված չեն, եւ չի հստակեցվում, թե որ մարմինն է իրականացնելու օրենքի պահանջը` ապա պարոն Պետրոսյանն ասաց, որ ֆերմերն ինքը չպիտի կտրի կենդանու պոչը կամ հանի ատամը, այլ անասնաբույժն է այդ գործողություններն անելու: Լինելու են համայնքային անասնաբույժներ, որոնք սպասարկելու են ընտանի կենդանիներին:
Կարդացեք նաև
Անդրադառնալով հանրապետությունով մեկ տարածված բրուցելոզին, ինչի հետեւանքով արդեն հազարավոր գլուխ անասուններ են հարկադիր մորթի ենթարկվել, փոխնախարարն ասաց, որ այդ հիվանդությունը նախկինում էլ եղել է, եւ այն ոչ թե շատացել է, այլ ստուգումների որակն է բարձրացել:
Ասուլիսի մեկ այլ մասնակից, գյուղնախարարության անասնաբուծության եւ անասնաբուժության վարչության պետ Աշոտ Հովհաննիսյանն, անդրադառնալով, նախորդ տարվա` մոծակների դեմ անարդյունավետ պայքարի ծրագրին ասաց. «Եթե մոծակները բաց տարածքում են, որտե՞ղ պայքարեին»: Հարցին էլ թե Վերահսկիչ պալատը հայտնաբերել էր, որ մոծակների դեմ պայքարն իրականացրել էր չլիցենզավորված կազմակերպություն, այս տարի նույն ծրագրի շրջանակներում հնարավո՞ր է նույն խախտումները կրկնվեն, Աշոտ Հովհաննիսյանն ասաց, որ հետեւելու են, որ պայքարը նպատակին ծառայի: Նրա խոսքերի շարունակությունը` տեսանյութում
Լրագրողները պարոն Հովհաննիսյանից նաեւ հետաքրքրվեցին, թե ծիրանի դեֆիցիտի պայմաններում ծիրան ներկրե՞լ ենք:
«Ընդամենը 1100 կգ` Թուրքիայից, հարավ աֆրիկյան երկրներից, քանի որ մեր ծիրանը ամենահամովն է եւ դրսից ներկրված ծիրանի պահանջարկ չկա»,-ասաց պարոն Հովհաննիսյանը:
Այս տարի, ապրիլի վերջին օրերին տեղի ունեցած ուժեղ կարկտահարության հետեւանքով 8 հազար տոննա ծիրանի բերք է եղել` անցյալ տարվա 88,8 հազարի փոխարեն: Փոխարենը, գյուղնախարարության պաշտոնյաները վստահեցրին, որ բարձր բերք է սպասվում հացահատիկի, բանջարաբոստանային, կերային մշակաբույսերի:
Լարսի անցակետի փակման պատճառով էլ արտահանման խնդիրներ են առաջացել եւ բերքի որոշ քանակություն օդային ճանապարհով է փոխադրվել:
Խոզերի աֆրիկյան ժանտախտի պատճառով շուրջ 5 հազար գլուխ խոզ պակասել է, տավարի գլխաքանակն էլ 2,5 տոկոսով ավելացել է, 5 տոկոսով էլ ոչխարների գլխաքանակն է աճել:
Լուսինե ԲՈՒԴԱՂՅԱՆ
