Այսօր «ԷկոԼուր» մամուլի ակումբում տեղի ունեցավ «Բիբլիական աղետ» անունը կրող ֆիլմի շնորհանդեսն ու քննարկումը՝ նվիրված Արարատյան դաշտավայրի ջրային ռեսուրսների շահագործմանը:
Ըստ հրապարակված տվյալների՝ ՀՀ բնապահպանության նախարարությունը ձկնաբուծարաններին տրամադրել է 1 միլիարդ 496 միլիոն խորանարդ մետր ստորերկրյա ջրօգտագործման թույլտվություն, ինչը տեղանքի վերականգնվող պաշարից 300 միլիոն խորանարդ մետրով ավելի է: Արդյունքում 7 տարվա ընթացքում 303 հորերից 102-ը չորացել են՝ իրենց հետ չորացնելով նաև այլ աղբյուրներ, ինչի պատճառով 6200 հեկտար հող մնացել է առանց ջուր: Նաև 75 տոկոսով նվազել է Ակնա լճի ջրի հոսանքը: Ինչպես նշում է ֆիլմի անձնակազմը, ստեղծված իրավիճակը օգտագործվեց Սևանա լճից ջրի բացթողումների ծավալն ավելացնելու համար, ինչը կհանգեցնի մեկ այլ աղետի՝ թողնելով Հայաստանն առանց քաղցրահամ ջրի ռազմավարական պաշարների: Սևանա լճի ջրի բացթողումների ծավալի ավելացման վերաբերյալ ՀՀ կառավարության որոշումը հավանության է արժանացել ՀՀ Ազգային ժողովի կողմից:
Ջրային տնտեսության պետական կոմիտեի աշխատակազմի ղեկավար Մհեր Մկրտումյանը Aravot.am-ի հետ զրույցում նշեց. «Սովետմիության ժամանակ շահագործվող շուրջ 2200 խորքային հորեր են եղել: Հիմա թվով 112-ը վերագործարկվում են՝ սակավաջրությամբ պայմանավորված: Սևանից ջուր վերցնելը նախատեսված էր Սևան-Հրազդան էներգետիկ դիլիգացիոն համակարգով, իսկ այս հորերի վերագործումը նախատեսված է Արմավիրի և Բաղրամյանի տարածաշրջանի համար: Ախուրյանի ջրամբարը շուրջ 180 միլիոն խորանարդ մետրով պակաս է լցված, Արաքս գետում նույնպես համապատասխան ջրաքանակ չկա: Ախուրյանի ջրամբարն անցած տարի հենց այս ժամանակ լցված է եղել 403 միլիոն խորանարդ մետրով, այսօր՝ 193 միլիոնով: Արաքս գետում անցած տարի ունեցել ենք 21 խորանարդ մետր վայրկյանում ջուր, հիմա ՝ տասը խորանարդ:Եթե նախկինում կարողանում էինք Ախուրյանի ջրամբարով և Արաքս գետով մեղմել սակավաջրության ռեժիմը, ապա հիմա, երբ ջրամբարի ու գետի սակավաջրությունը փաստ է դարձել, նախատեսվում է խորքային հորերը վերագործարկել, որպեսզի կարողանանք այդ տարածաշրջանի ոռոգման հետ կապված խնդիրները լուծել: Հիմնական մեր գործողությունը չորս ջրամբարաշինական ծրագրերն են, որոնք նախատեսվում են առաջիկա հինգ տարիների ընթացքում»:
«Բիբլիական աղետ» -ի ստեղծման աշխատանքների մասնակից Ինգա Զարաֆյանը հավելեց, որ ֆիլմը կցուցադրվի նաև Արմավիրի, Արարատի, Գեղարքունիքի մարզերում: Հետագայում խնդրի վերաբերյալ առաջարկությունները կընդգրկվեն առաջարկությունների փաթեթի մեջ, որը կուղարկվի ՀՀ Ազգային ժողով եւ ՀՀ կառավարություն: Ֆիլմի ստեղծմանը մասնակցել են Նիկոլայ Դավթյանը, Վիկտորյա Բուռնազյանը, Մոնիկա Երիցյանը, Տաթևիկ Գրիգորյանը, Գագիկ Քոչինյանն ու Ինգա Զարաֆյանը:
Կարդացեք նաև
Սյունե ՍԵՎԱԴԱ
