Հուլիսի 3-ի առավոտյան, ժամը 9-ն անց 40-ի սահմաններում սկսվել է այրվել Նոյեմբերյան քաղաքի կենտրոնում, Երեւանյան փողոցի խաչմերուկում գտնվող, մանր գործարար Մարիամ Հակոբյանին պատկանող խանութը:
Այն մարվել է հրշեջների կողմից: Մ. Հակոբյանն օրվա երկրորդ կեսին մեզ զանգահարելով, խնդրեց տեսնել եւ հրապարակել հրդեհի պատճառած վնասները: Ենթադրաբար էլեկտրական հոսանքի պատճառով ամբողջությամբ այրել են խանութի 2 սառնարանները, 2 էլեկտրոնային կշեռքները, օդափոխման սարքը, էլեկտրական սրճաղացը,ծխախոտի տաղավարը, հաշվիչ սարքը, խանութի ապակիները,մթերային խանութի գրեթե բոլոր ապրանքները: Պատճառված վնասը, Մ. Հակոբյանի գնահատմամբ ,կազմում է ավելի քան 5 միլիոն դրամ: Մ. Հակոբյանը դեպքի կապակցությամբ դիմել է Նոյեմբերյանի քաղաքապետ Վանուշ Ամիրաղյանին եւ Տավուշի մարզպետ Հովիկ Աբովյանին: Վանուշ Ամիրաղյանը հայտնեց, որ հրդեհի կապակցությամբ հրշեջ տեսչությունը քննություն է կատարում:
Կարդացեք նաև
Մարիամ Հակոբյանն ասաց, որ ինքը խանութն աշխատեցնելու համար «Ֆինկա» վարկային կազմակերպությունից եւ «Ակբա Կրեդիտ Ագրիկոլ» բանկից վերցրած վարկեր ունի: Նա ակնկալում է, որ «ԱԿԲԱ»-ից վերցրած վարկի եւ դրա տոկոսների մարումը, ֆորս մաժորային իրավիճակի հետեւանքով,որոշ ժամանակով կսառեցվի:
Ոսկան ՍԱՐԳՍՅԱՆ
